حیدرآباد، 18 ۔ جنوری (ہ س)۔حیدرآباد کے مضافاتی علاقے میڈی پلی میں ایک بار پھر چوروں کے گروہ نے مسلسل وارداتیں انجام دے کر عوام میں خوف و ہراس پھیلادیاہے۔ دو راتوں کے دوران کئی رہائشی مکانات کو نشانہ بنایا گیا،جن کی سی سی ٹی وی فوٹیج سامنے آنے کے بعد مقامی لوگوں میں سکیورٹی کے حوالے سے شدید تشویش پیداہو گئی ہے۔مقامی اطلاعات کے مطابق، چوریوں کا یہ سلسلہ 15 اور 16 جنوری کی درمیانی شب کو چنگی چیرلا سے شروع ہوا، جہاں 10 سے 12 مکانات میں نقب زنی کی گئی۔ چوروں نے گھروں کے دروازوں کے تالے توڑکراندر داخل ہو کر سونا، چاندی کے زیورات اور نقد رقم لوٹ لی۔اگلی ہی رات، یعنی 16 اور 17 جنوری کی درمیانی شب، یہی گروہ قریبی علاقے پرتاپ سنگارم میں سرگرم رہا، جو میڈی پلی کے دائرے میں آتا ہے۔ یہاں دو مکانات میں کامیاب چوری کی گئی جبکہ ایک اور مکان میں چوری کی کوشش ناکام بنا دی گئی۔ یہ پوری کارروائی سی سی ٹی وی کیمروں میں قید ہو گئی، جس میں مشتبہ افراد کو گھروں کے اطراف احتیاط سے گھومتے ہوئے دیکھا جا سکتاہے۔مسلسل وارداتوں کے بعد میڈی پلی، چنگی چیرلا اور پرتاپ سنگارم کے رہائشی خوفزدہ ہیں۔ مقامی لوگوں نے رات کی گشت بڑھانے اور چوروں کی فوری شناخت و گرفتاری کا مطالبہ کیا ہے۔ اس کے ساتھ ہی عوام سے اپیل کی جا رہی ہے کہ وہ اپنے گھروں کی حفاظت کے لیے اضافی احتیاطی تدابیر اختیار کریں۔پولیس نے چوریوں سے متعلق سی سی ٹی وی فوٹیج کا نوٹس لے لیا ہے اور مشتبہ افراد کی شناخت کے لیے کارروائی شروع کر دی ہے۔ حکام کے مطابق خصوصی ٹیمیں تشکیل دیے جانے کا امکان ہے تاکہ میڈی پلی میں سرگرم چوروں کے گروہ کو گرفتار کیا جا سکے اور آئندہ ایسی وارداتوں کو روکا جا سکے۔حیدرآباد کے مضافات میں بار بار ہونے والی یہ چوریاں رہائشی سکیورٹی پر سنجیدہ سوالات کھڑے کر رہی ہیں،جبکہ عوام کوآنے والے دنوں میں پولیس کی مؤثر کارروائی کی امید ہے۔

ہندوستھان سماچار

ہندوستان سماچار / محمدعبدالخالق