حیدرآباد، 18 ۔ جنوری (ہ س)۔تلنگانہ میں ایک اہم پیش رفت کے تحت نائب وزیر اعلیٰ بھٹی وکرامارکا نے جمعہ کے روز نینی کوئلہ بلاک کا ٹینڈر منسوخ کرنے کا اعلان کیا اور سنگارینی کولیئرز کو تازہ ٹینڈرز طلب کرنے کی ہدایت دی۔ یہ فیصلہ ٹینڈر شرائط میں مبینہ رد و بدل اور خواتین آئی اے ایس افسران کو نشانہ بنانے والے توہین آمیز معاملے کے پس منظر میں سامنے آیا ہے۔تلنگانہ میں نینی کوئلہ بلاک ٹینڈر کی منسوخی کے بعدریاست بھرمیں سیاسی اور انتظامی حلقوں میں بحث چھڑگئی ہے۔نینی کوئلہ بلاک، جواڈیشہ میں واقع ہے،سنگارینی کولیئرزکمپنی لمیٹڈ کی ملکیت ہے اور طویل مدت کی کانکنی صلاحیت کی وجہ سے اسے انتہائی قیمتی سمجھا جاتا ہے۔ اس بحران تک پہنچنے میں کئی عوامل شامل رہے۔ابتدائی طور پر پچھلی حکومت کے دوران اعتراضات کی وجہ سے کانکنی حقوق کا معاملہ رک گیا تھا۔ حکومت کی تبدیلی کے بعد کوئلہ بلاک ٹینڈر عمل دوبارہ شروع کیا گیا۔ چونکہ کانکنی کے حقوق 25 سال کے لیے تھے، اس لیے یہ ٹینڈر مالی طور پر نہایت منافع بخش تصور کیا جا رہا تھا۔ٹنڈر کے دوبارہ آغاز کے ساتھ ہی ہیرا پھیری کے الزامات سامنے آئے۔ مبینہ طور پر کانکنی کا تجربہ نہ رکھنے والے فریقین نے بڑی انفراسٹرکچر کمپنیوں کے ساتھ جوائنٹ وینچر تشکیل دیے۔ الزام ہے کہ ٹینڈر کی شرائط کو مخصوص جوائنٹ وینچر کے حق میں ڈیزائن کیا گیا۔ اس کے تحت فیلڈ وزٹ سرٹیفکیٹ کو لازمی قرار دیا گیا، جو مبینہ طور پر منتخب اداروں کو ہی جاری کیے گئے، جس سے تجربہ کار کمپنیوں کی اہلیت محدود ہو گئی۔یہ پیش رفت سیاسی اور بیوروکریٹک حلقوں میں تشویش کا سبب بنی۔معاملہ اس وقت مزید سنگین ہو گیا جب خواتین آئی اے ایس افسران کو نشانہ بنانے والی توہین آمیز رپورٹس منظر عام پر آئیں۔اطلاعات کے مطابق میڈیاپر اندرونی دباؤ کے الزامات بھی سامنے آئے۔اس دوران ایک خاتون آئی اے ایس افسرکو مبینہ طور پرنیندکی گولیاں لینے کے بعد ہاسپٹل میں داخل کرایا گیا۔اس واقعے کے بعد آل انڈیا سروس افسران نے شدید احتجاج کیا۔ خصوصی تحقیقاتی ٹیم (ایس آئی ٹی) تشکیل دی گئی اور کچھ صحافیوں کی گرفتاری عمل میں آئی، جس سے انتظامی نظام میں تناؤ پیداہوگیا۔مسلسل دباؤ اور بے چینی کے ماحول کے بعد نائب وزیر اعلیٰ بھٹی وکرامارکا نے نینی کوئلہ بلاک ٹنڈر منسوخ کرنے کااعلان کیا۔ سنگارینی کولیئرز کو شفاف طریقے سے نئے ٹنڈرز طلب کرنے کی ہدایت دی گئی۔ سینئر افسران نے واضح کیاکہ اس معاملے کی سنگینی کو نظر انداز نہیں کیاجاسکتا۔یہ قدم تلنگانہ کے کوئلہ کانکنی ٹینڈر عمل پر اعتماد بحال کرنے کی کوشش کے طور پر دیکھا جا رہا ہے۔اگرچہ ٹنڈر منسوخ کر دیا گیا ہے، لیکن اب سب کی نظریں ایس آئی ٹی کی تحقیقات پر مرکوز ہیں، جس سے یہ طے ہونا ہے کہ ٹنڈر میں مبینہ ہیرا پھیری کا ذمہ دار کون ہے، توہین آمیز مہم کے پیچھے کون تھا، اور افسران و دیگر افراد کی کیا جواب دہی بنتی ہے۔تلنگانہ میں نینی کوئلہ بلاک تنازع، جس میں کانکنی حقوق، بیوروکریسی کی عزت اور سیاسی اثر ورسوخ شامل ہیں، فی الحال ختم ہوتا نظر نہیں آتا اور اس کے طویل مدتی اثرات مرتب ہونے کا امکان ہے۔

ہندوستھان سماچار

ہندوستان سماچار / محمدعبدالخالق