لاتیہار، 18 جنوری (ہ س)۔ جھارکھنڈ کے لاتیہار ضلع کے مہواڈنڈ تھانہ علاقے میں اورسا وادی کے قریب اتوار کو ایک المناک بس حادثے میں چھ افراد ہلاک اور 60 سے زیادہ زخمی ہوگئے۔ حادثے سے علاقے میں شدید خوف و ہراس پھیل گیا۔ متعدد زخمیوں کی حالت تشویشناک بتائی جاتی ہے۔لاتیہار پولیس اور انتظامیہ سے موصول ہونے والی معلومات کے مطابق، مرنے والوں میں شانتی دیوی (45)، پریما دیوی (35)، سیتا دیوی (40)، سونمتی دیوی (42) اور سکھنا بھویاں (40) شامل ہیں، جن کی جائے وقوعہ پر ہی موت ہوگئی۔ وجے بھویاں کی علاج کے دوران موت ہو گئی۔ تمام مرنے والے چھتیس گڑھ کے ضلع بلرام پور کے رہنے والے تھے۔زخمیوں میں سے 32 کو رانچی کے راجندر انسٹی ٹیوٹ آف میڈیکل سائنسز (ریمس) ریفر کر دیا گیا ہے، جبکہ باقی زخمیوں کو ریمس منتقل کرنے کا عمل مرحلہ وار جاری ہے۔ کچھ مقامی ہسپتالوں میں زیر علاج ہیں۔

پولیس کے مطابق، چھتیس گڑھ کے بلرام پور ضلع سے تقریباً 85 افراد کو لے کر ایک ریزروڈ بس ایک نوجوان کی منگنی کی تقریب میں شرکت کے لیے لاتیہار ضلع کے لودھ گاو¿ں جا رہی تھی۔ بس اچانک کنٹرول کھو بیٹھی اور اورسا وادی کے قریب الٹ گئی۔ حادثہ اتنا شدید تھا کہ تقریباً تمام مسافر زخمی ہو گئے۔حادثے کے فوراً بعد مقامی دیہاتیوں نے فوری کارروائی کی اور پولیس اور انتظامیہ کو اطلاع دی۔ اطلاع ملنے پر سب ڈویڑنل آفیسر وپن کمار دوبے کی قیادت میں ایک انتظامی ٹیم اور محکمہ صحت کی ایک ٹیم جائے وقوعہ پر پہنچی۔ زخمیوں کو ایمبولینس اور مقامی گاڑیوں کی مدد سے اسپتال منتقل کیا گیا جب کہ بس میں پھنسے مسافروں کو کافی کوشش کے بعد بچا لیا گیا۔

سب ڈویژنل افسر وپن کمار دوبے نے بتایا کہ پانچ افراد کی جائے وقوعہ پر ہی موت ہو گئی، جب کہ سرکاری طور پر چھٹے شخص کی موت کی تصدیق کا عمل جاری ہے۔ انہوں نے مزید کہا کہ زخمیوں کے علاج کے لیے آس پاس کے بلاکس سے ڈاکٹروں کو بلایا گیا ہے۔ گملا ضلع سے بھی طبی امداد طلب کی گئی ہے، جب کہ چھتیس گڑھ کے سرحدی علاقوں سے ڈاکٹروں کی ایک ٹیم ایمبولینسوں کے ساتھ مدد کے لیے پہنچی ہے۔

ہندوستھان سماچار

ہندوستان سماچار / Mohammad Khan