حیدرآباد، 18 ۔ جنوری (ہ س)۔حیدرآباد کے فلم نگر مین روڈ پر ایک تیز رفتار کار الٹنے کا واقعہ پیش آیا جس سے ہوٹل میں موجود افراد اور راہگیروں میں شدید خوف و ہراس پھیل گیا۔ یہ واقعہ فلم نگرپولیس اسٹیشن کی حدود میں پیش آیا، جہاں اچانک پیش آئے حادثے کو عینی شاہدین نے فلمی اسٹنٹ جیسا منظر قرار دیا۔اطلاعات کے مطابق کار انتہائی تیز رفتاری سے آرہی تھی کہ ڈرائیور اس پر قابو نہ رکھ سکا اور گاڑی ایک ہوٹل کے قریب الٹ گئی۔ حادثہ اتنا اچانک تھا کہ ہوٹل کے اندر موجود افراد اور سڑک پر چلنے والے لوگ جان بچانے کے لیے ادھر ادھر بھاگنے لگے۔ زور دار آواز کے باعث کچھ دیر کے لیے علاقے میں افراتفری کا ماحول پیدا ہوگیا۔بتایاجاتاہے کہ حادثے کے فوراً بعد دو افراد الٹی ہوئی کار سے باہر نکلے اور موقع سے فرار ہوگئے۔ ان افراد کی شناخت اور حالت کے بارے میں تاحال کوئی باضابطہ اطلاع سامنے نہیں آئی ہے۔واقعے کی اطلاع ملتے ہی فلم نگر پولیس موقع پرپہنچی اورحالات کا جائزہ لیا۔ پولیس نے اس سلسلے میں مقدمہ درج کرلیا ہے اور حادثے کی وجوہات جاننے کے ساتھ ساتھ فرار ہونے والے افراد کی تلاش کے لیے تحقیقات شروع کردی ہیں۔یہ فلم نگر پولیس اسٹیشن حدود میں تیز رفتارکارالٹنے کا واقعہ ایک بار پھر شہرکی مصروف سڑکوں پر تیزرفتاری کے خطرناک نتائج کواجاگرکرتاہے۔پولیس نے شہریوں سے اپیل کی ہے کہ وہ ٹریفک قوانین اوررفتارکی پابندی کریں تاکہ اس طرح کے حادثات سے بچاجاسکے۔مزیدتفصیلات پولیس تحقیقات مکمل ہونےکے بعدسامنے آنے کی توقع ہے۔

ہندوستھان سماچار

ہندوستان سماچار / محمدعبدالخالق