جموں, 17 جنوری (ہ س)شری ماتا ویشنو دیوی شرائن بورڈ نے کٹرا میں یومِ جمہوریہ کی تقریبات کے پیش نظر سیکورٹی اور انتظامی انتظامات کا جائزہ لیا۔ اس دوران کثیر سطحی سیکورٹی، ہجوم کے مؤثر نظم و نسق اور یاترا کی ہموار نگرانی پر خصوصی زور دیا گیا۔

شری ماتا ویشنو دیوی شرائن بورڈ کے چیف ایگزیکٹو آفیسر سچن کمار ویشیا نے کٹرا کے اسپرچوئل گروتھ سینٹر میں منعقدہ میٹنگ کی صدارت کرتے ہوئے ریاسی ضلع انتظامیہ، پولیس اور دیگر متعلقہ محکموں کے ساتھ تال میل میں تیاریوں کا تفصیلی جائزہ لیا۔ بورڈ کے ترجمان کے مطابق اجلاس میں یومِ جمہوریہ اور یاترا کے دوران سیکورٹی انتظامات پر تفصیلی غور و خوض کیا گیا۔

میٹنگ میں کٹرا کے سپرنٹنڈنٹ آف پولیس اور سی آر پی ایف کے کمانڈنٹ نے بتایا کہ یومِ جمہوریہ کی تقریبات اور یاترا کی نگرانی کے لیے جامع سیکورٹی انتظامات کیے جا رہے ہیں، جن میں کوئیک رسپانس ٹیموں کی تعیناتی، مشترکہ گشت اور پولیس، سی آر پی ایف، فوج اور دیگر نیم فوجی دستوں پر مشتمل کثیر سطحی سیکورٹی گرِڈ شامل ہے۔سی ای او سچن کمار ویشیا نے لیفٹیننٹ گورنر کی ہدایات کے مطابق سیکورٹی کو مزید مضبوط بنانے کی ضرورت پر زور دیا۔ انہوں نے تمام ایجنسیوں کے درمیان بہتر ہم آہنگی کو یقینی بنانے پر بھی زور دیا تاکہ یاترا بلا رکاوٹ جاری رہے اور یومِ جمہوریہ کی تقریبات خوش اسلوبی سے منعقد کی جا سکیں۔

انہوں نے ہجوم کی مؤثر نگرانی، آر ایف آئی ڈی کارڈز کی سخت جانچ اور تلاشی کے اصولوں پر سختی سے عمل درآمد کی ہدایت دی۔ ان کا کہنا تھا کہ صرف رجسٹرڈ یاتریوں اور مجاز سروس فراہم کنندگان کو ہی یاترا کے راستے پر جانے کی اجازت دی جائے گی۔بورڈ کے ترجمان کے مطابق یومِ جمہوریہ کی مرکزی تقریب کٹراکے ویشنو دیوی اسپورٹس کمپلیکس میں منعقد ہوگی، جہاں سی ای او قومی پرچم لہرائیں گے اور جموں و کشمیر پولیس، سی آر پی ایف، شرائن سیکورٹی، این سی سی کیڈٹس اور اسکولی بچوں کے دستوں کی سلامی لیں گے۔

اجلاس میں حکام کو ہدایت دی گئی کہ تمام انتظامات مقررہ رہنما اصولوں کے مطابق یقینی بنائے جائیں۔ اس کے علاوہ اسٹیج اور نشستوں کے انتظامات، صفائی، پینے کے پانی کی سہولت، فائر فائٹنگ گاڑیوں کی تعیناتی اور مجموعی سیکیورٹی پر بھی تفصیلی تبادلہ خیال کیا گیا۔

میٹنگ میں یاترا اور ہجوم کی حقیقی وقت میں نگرانی اور کسی بھی ہنگامی صورتحال سے نمٹنے کے لیے قائم انٹیگریٹڈ کمانڈ اینڈ کنٹرول سینٹر (آئی سی سی سی) کا بھی جائزہ لیا گیا۔ بھون میں پرچم کشائی کی تقریب سے متعلق انتظامات پر بھی گفتگو ہوئی، جس میں یاترا کی آمد و رفت کو منظم کرنے، داخلہ و اخراج کے مقامات کو باقاعدہ کرنے، عوامی اعلانات اور اضافی سیکیورٹی اہلکاروں کی تعیناتی کی ہدایات دی گئیں۔

ہندوستھان سماچار

---------------

ہندوستان سماچار / محمد اصغر