بھوپال، 17 جنوری (ہ س)۔ شمالی ہند سے آ رہی برفیلی ہواوں کے اثر سے مدھیہ پردیش میں شدید سردی پڑ رہی ہے۔ ریاست میں کم از کم درجہ حرارت گر کر 2.5 ڈگری سیلسیس تک پہنچ گیا۔

محکمہ موسمیات کے مطابق، پہاڑی علاقوں میں ہوئی برف باری کے بعد ریاست میں سردی مزید تیز ہوگئی ہے۔ اگلے دو سے تین دن تک شدید سردی برقرار رہنے کا امکان ہے۔ 19 جنوری سے شمال-مغربی ہند میں ایک نیا ویسٹرن ڈسٹربنس سرگرم ہوگا، جس کے اثر سے ریاست میں بادل اور ہلکی بارش کی صورتحال بھی بن سکتی ہے۔ محکمہ موسمیات کا کہنا ہے کہ نیا سسٹم سرگرم ہونے پر موسم میں تبدیلی دیکھنے کو مل سکتی ہے۔ ہفتہ کی صبح 15 سے زیادہ اضلاع میں ہلکے سے درمیانہ کوہرے کی چادر چھائی رہی، جبکہ شہڈول، انوپ پور، امریا، کٹنی اور میہر میں سرد لہر کا الرٹ جاری کیا گیا ہے۔

جمعہ کی رات کئی اضلاع میں درجہ حرارت میں تیز گراوٹ درج کی گئی۔ ریاست میں سب سے ٹھنڈا ضلع مندسور رہا۔ یہاں درجہ حرارت 2.5 ڈگری درج کیا گیا۔ مندسور کے بعد کٹنی کے کروندی میں 2.7 ڈگری، شاجاپور میں 3.3 ڈگری، شہڈول کے کلیان پور میں 3.5 ڈگری اور پچمڑھی میں 3.8 ڈگری سیلسیس درجہ حرارت رہا۔ راج گڑھ میں 4.5 ڈگری، امریا میں 5.3 ڈگری، منڈلا میں 5.6 ڈگری، ریوا میں 5.8 ڈگری اور ملاجکھنڈ میں 6.1 ڈگری درج کیا گیا۔ دتیا، رائسین اور نوگاوں میں پارہ 6.8 ڈگری رہا، جبکہ دیگر شہروں میں درجہ حرارت 10 ڈگری کے آس پاس بنا ہوا ہے۔ بڑے شہروں کی بات کریں تو گوالیار میں کم از کم درجہ حرارت 5.9 ڈگری، بھوپال میں 6 ڈگری، اندور میں 6.2 ڈگری، اجین میں 7.5 ڈگری اور جبل پور میں 8.8 ڈگری سیلسیس درج کیا گیا۔

راج گڑھ میں گھنا کوہرا چھایا رہا، جہاں ویزیبلٹی 50 سے 200 میٹر تک سمٹ گئی۔ بھوپال، دتیا، گوالیار، ستنا، ریوا اور کھجوراہو میں حد نگاہ قریب 1 کلومیٹر رہی۔ اجین، رتلام، اندور، نرمدا پورم، گنا، دموہ، منڈلا، نوگاوں اور ساگر میں ویزیبلٹی 1 سے 2 کلومیٹر کے درمیان درج کی گئی۔

ماہرین موسمیات کے مطابق، مغربی-شمالی ہند کے اوپر قریب 12.6 کلومیٹر کی اونچائی پر 240 کلومیٹر فی گھنٹہ کی رفتار سے جیٹ اسٹریم ہوائیں چل رہی ہیں، جس کا اثر مدھیہ پردیش کے موسم پر بھی پڑ رہا ہے۔ وہیں، 16 جنوری سے سرگرم ویسٹرن ڈسٹربنس آگے بڑھ چکا ہے اور 19 جنوری سے نیا سسٹم اثر دکھا سکتا ہے۔ اگر یہ مضبوط رہا تو 21-20 جنوری کے بعد ریاست میں بادل اور بارش دیکھنے کو مل سکتی ہے۔

ہفتہ کی صبح گوالیار، چمبل، ساگر اور ریوا ڈویژن کے کئی اضلاع میں درمیانہ سے گھنا کوہرا رہا۔ اندور، بھوپال، اجین اور نرمدا پورم ڈویژن میں بھی کوہرے کا اثر دیکھا گیا۔ کم حد نگاہ کے سبب دہلی سے بھوپال، اندور اور اجین آنے والی کئی ٹرینیں تاخیر سے چل رہی ہیں۔ مالوا، جہلم، سچ کھنڈ ایکسپریس سمیت پنجاب میل اور جن شتابدی سمیت قریب ایک درجن ٹرینیں متاثر ہوئی ہیں۔

ہندوستھان سماچار

---------------

ہندوستان سماچار / انظر حسن