شاہ رخ خان کے مداحوں کے لیے بڑی اور دلچسپ خبر ہے۔ طویل عرصے سے تاخیر کا شکار فلم 'ڈان 3' کے حوالے سے اب ایک اہم اپ ڈیٹ سامنے آیا ہے۔ رپورٹس کے مطابق رنویر سنگھ کے پروجیکٹ سے باہر ہونے کے بعد پروڈیوسر ہدایت کار فرحان اختر نے ایک بار پھر اصل ’ڈان‘ شاہ رخ خان سے رابطہ کیا ہے۔ اہم بات یہ ہے کہ شاہ رخ اس مشہور کردار میں واپسی کے لیے تیار ہیں لیکن انہوں نے ایک اہم شرط رکھی ہے۔

تقریباً دو سال قبل، فرحان اختر نے رنویر سنگھ کو ڈان 3 کے لیے نئے ڈان کے طور پر اعلان کیا، جس نے شاہ رخ کے مداحوں کو ناراض کیا۔ اب حالیہ رپورٹس کے مطابق رنویر نے فلم سے کنارہ کشی اختیار کر لی ہے۔ بتایا جا رہا ہے کہ ”دھرندھر“ کی زبردست کامیابی کے بعد رنویر نے اپنی ترجیحات بدل دی ہیں اور وہ اب گینگسٹر فلموں کا حصہ نہیں بننا چاہتے۔ رنویر کے باہر جانے کے بعد فرحان اختر نے ایک بار پھر شاہ رخ خان کا رخ کیا ہے۔

شاہ رخ خان ’ڈان‘ کا کردار دوبارہ ادا کرنے کے لیے تیار ہیں لیکن انھوں نے واضح طور پر کہا ہے کہ ’ڈان 3‘ کو فرحان اختر نہیں بلکہ ’جوان‘ کے ڈائریکٹر ایٹلی کو ڈائریکٹ کرنا چاہیے۔ شاہ رخ خان کا خیال ہے کہ ایٹلی کا بڑے پیمانے پر ایکشن کا انداز اور عالمی اپیل ڈان فرنچائز کو بین الاقوامی سطح پر نئی بلندیوں تک لے جا سکتی ہے۔ غور طلب ہے کہ شاہ رخ اور ایٹلی کی فلم جوان نے دنیا بھر میں 1,160 کروڑ روپے کی شاندار کمائی کی۔

ڈان فرنچائز کا آغاز 2006 میں ہوا جب فرحان اختر نے امیتابھ بچن کی کلاسک ڈان کو شاہ رخ خان کے ساتھ دوبارہ بنایا۔ یہ فلم سپرہٹ رہی جس کے بعد 2011 میں ڈان 2 آئی جس نے باکس آفس پر زبردست کامیابی بھی حاصل کی۔ اب، تقریباً 15 سال بعد، اگر شاہ رخ خان ڈان 3 کے ساتھ واپس آتے ہیں، تو یہ ان کے مداحوں کے لیے بہت بڑا جشن ہوگا۔

ہندوستھان سماچار

ہندوستان سماچار / عطاءاللہ