نئی دہلی، 16 جنوری (ہ س)۔ ہندوستانی خاتون کرکٹ ٹیم کی اسٹار سلامی بلے باز اسمرتی مندھانا کو آئندہ ’ویمنس ہنڈریڈ‘ ٹورنامنٹ کے لیے مانچسٹر سپر جائنٹس نے سائن کر لیا ہے۔ فرنچائزی نے جمعرات کو اس بڑے معاہدے کا باضابطہ اعلان کیا۔ مندھانا کے ٹیم سے منسلک ہونے سے مانچسٹر سپر جائنٹس کی بلے بازی کو مضبوطی ملنے کی امید ہے۔

اسمرتی مندھانا اس سے پہلے 2021 سے 2024 تک ہنڈریڈ لیگ کے چار سیزن کھیل چکی ہیں۔ اس دوران انہوں نے سدرن بریو کی جانب سے 29 اننگز میں 676 رن بنائے۔ اپنی جارحانہ لیکن پرکشش بلے بازی کے لیے پہچانی جانے والی مندھانا لیگ کی سب سے کامیاب غیر ملکی کھلاڑیوں میں شامل رہی ہیں۔

اب تک ویمنس ہنڈریڈ میں کل چھ ہندوستانی کھلاڑی حصہ لے چکی ہیں۔ اس فہرست میں ہندوستانی کپتان ہرمن پریت کور، تجربہ کار آل راونڈر دیپتی شرما، دھماکہ خیز سلامی بلے باز شیفالی ورما، جارحانہ وکٹ کیپر-بلے باز ریچا گھوش اور مڈل آرڈر کی قابل اعتماد بلے باز جمائمہ روڈریگز شامل ہیں۔ اسمرتی مندھانا بھی اس باوقار فہرست کا اہم حصہ رہی ہیں۔

مانچسٹر سپر جائنٹس نے اسمرتی مندھانا کے علاوہ آسٹریلیا کی سابق کپتان میگ لیننگ کو بھی اپنی ٹیم میں شامل کیا ہے۔ میگ لیننگ اس سے پہلے لندن اسپرٹ اور اوول انونسیبلز کی نمائندگی کر چکی ہیں۔ ہنڈریڈ ٹورنامنٹ میں کھیلے گئے 18 مقابلوں میں لیننگ نے 132.08 کے اسٹرائیک ریٹ سے 457 رن بنائے ہیں۔

ان دونوں عظیم بلے بازوں کے ٹیم میں شامل ہونے سے مانچسٹر سپر جائنٹس کو آئندہ ویمنس ہنڈریڈ سیزن میں خطاب کا مضبوط دعویدار مانا جا رہا ہے۔

ہندوستھان سماچار

ہندوستان سماچار / انظر حسن