ممبئی میں مہایوتی کی مضبوط پیش قدمی، بی ایم سی میں بی جے پی کی فیصلہ کن سبقتممبئی، 16 جنوری (ہ س)۔ برہن ممبئی میونسپل کارپوریشن کے انتخابات میں ووٹوں کی گنتی کے ساتھ ہی ممبئی کا سیاسی منظرنامہ واضح ہونا شروع ہو گیا ہے۔ تازہ رجحانات کے مطابق بی جے پی کی قیادت والے اتحاد نے اکثریتی ہندسے کو عبور کرتے ہوئے بی ایم سی میں فیصلہ کن سبقت حاصل کر لی ہے۔

ریاستی الیکشن کمیشن کے جاری کردہ تازہ ڈیٹا کے مطابق بی جے پی اتحاد کے امیدوار 227 میں سے 131 نشستوں پر آگے چل رہے ہیں۔ ان میں بھارتیہ جنتا پارٹی کے 102 امیدوار شامل ہیں، جبکہ شیو سینا (شندے دھڑا) کے 29 امیدوار بھی برتری کے ساتھ آگے ہیں۔ اس طرح اتحاد واضح طور پر اکثریت کی پوزیشن میں نظر آ رہا ہے۔

دوسری جانب اپوزیشن جماعتوں کی کارکردگی محدود دکھائی دے رہی ہے۔ شیو سینا (ادھو بالا صاحب ٹھاکرے دھڑا) 65 نشستوں پر آگے ہے، جبکہ مہاراشٹر نونرمان سینا 9 نشستوں پر سبقت رکھتی ہے۔ کانگریس 15 نشستوں پر برتری حاصل کیے ہوئے ہے اور آزاد امیدوار 7 نشستوں پر آگے بتائے جا رہے ہیں۔

انتخابی حکام کا کہنا ہے کہ ممبئی میں ووٹوں کی گنتی بغیر کسی ناخوشگوار واقعے کے جاری ہے۔ تمام مراکز پر انتظامیہ، پولیس اور انتخابی عملہ تعینات ہے اور گنتی کے عمل کی مسلسل نگرانی کی جا رہی ہے تاکہ شفافیت اور نظم و ضبط برقرار رہے۔

واضح رہے کہ جمعرات کو مہاراشٹر بھر میں میونسپل کارپوریشنوں کے لیے ووٹنگ کرائی گئی تھی۔ جمعہ کی صبح تمام 29 میونسپل کارپوریشنوں میں ووٹوں کی گنتی شروع ہوئی۔ ابتدائی رجحانات کے مطابق ریاست کے کئی بڑے شہروں، جن میں ناگپور، پونے، ناسک اور تھانے شامل ہیں، وہاں بھی بی جے پی کی قیادت والا اتحاد سبقت حاصل کرتا دکھائی دے رہا ہے۔ گنتی کا عمل جاری ہے اور حتمی نتائج بعد میں سامنے آئیں گے۔

ہندوستھان سماچار

--------------------

ہندوستان سماچار / جاوید این اے