ڈھاکہ، 16 جنوری (ہ س)۔ بنگلہ دیش جماعت اسلامی کی قیادت والے اتحاد نے 12 فروری کو ہونے والے 13ویں پارلیمانی انتخابات کے لیے 253 سیٹوں کی تقسیم کا اعلان کیا ہے۔ جماعت 179 سیٹ، نیشنل سٹیزن پارٹی (این سی پی) 30، مامون الحق کی قیادت والی بنگلہ دیش خلافت مجلس 20، خلافت مجلس 10، لبرل ڈیموکریٹک پارٹی سات، اے بی پارٹی تین، نظام اسلامی پارٹی دو اور بنگلہ دیش ڈیولپمنٹ پارٹی دو سیٹوں پر الیکشن لڑے گی۔ یہ جانکاری جماعت کے نائب امیر سید عبداللہ محمد طاہر نے جمعرات دیر شام پریس کانفرنس میں دی۔

دی ڈھاکہ ٹریبیون کی رپورٹ کے مطابق، طاہر نے کاکریل علاقے کے انسٹی ٹیوشن آف ڈپلومہ انجینئرز میں یہ اعلان کیا۔ اس دوران اتحاد کے اہم اتحادیوں میں سے ایک اسلامی آندولن بنگلہ دیش (آئی اے بی) نے پریس کانفرنس کا بائیکاٹ کیا۔ طاہر نے کہا کہ یہ ابھی طے نہیں ہوا ہے کہ اتحاد کے دو دیگر حلیف بنگلہ دیش خلافت آندولن اور جاتیہ گنترک پارٹی کو کتنی سیٹیں دی جائیں گی۔ بائیکاٹ کرنے والے اسلامی آندولن بنگلہ دیش کے لیے 47 سیٹیں محفوظ کی گئی ہیں۔

اس بیچ جماعت اسلامی نے الزام لگایا کہ کئی علاقوں میں انتخابی ضابطہ اخلاق کی خلاف ورزی کے باوجود الیکشن کمیشن غیر فعال بنا ہوا ہے۔ جماعت کے اسسٹنٹ جنرل سکریٹری حامد الرحمان آزاد نے اگرگاوں میں چیف الیکشن کمشنر اے ایم ایم ناصر الدین سے ملنے کے بعد یہ بات کہی۔ انہوں نے کہا کہ ایک سیاسی پارٹی کھلے عام ضابطہ اخلاق کی خلاف ورزی کر رہی ہے۔ کمیشن اس پر آنکھ بند کیے ہوئے ہے۔ جو ضابطے کی خلاف ورزی نہیں کر رہے، انہیں پریشان کیا جا رہا ہے۔

ہندوستھان سماچار

---------------

ہندوستان سماچار / انظر حسن