ورلڈ بینک نے 26-2025 کے لیے جی ڈی پی شرح نمو کا تخمینہ بڑھا کر 7.2 فیصد کیا

نئی دہلی، 15 جنوری (ہ س)۔ معاشی محاذ پر ہندوستان کے لیے اچھی خبر ہے۔ ورلڈ بینک نے مضبوط گھریلو مانگ اور ٹیکس اصلاحات کے دم پر رواں مالی سال 26-2025 کے لیے ملک کی مجموعی گھریلو پیداوار (جی ڈی پی) کی شرح نمو کا تخمینہ بڑھا کر 7.2 فیصد کر دیا ہے۔ یہ اس کے جون کے تخمینے سے 0.9 فیصد زیادہ ہے۔

ورلڈ بینک نے جاری اپنی اہم رپورٹ ’گلوبل اکنامک پراسپیکٹس‘ (عالمی اقتصادی امکانات) میں کہا ہے کہ رواں مالی سال 26-2025 میں ہندوستان کی جی ڈی پی شرح نمو 7.2 فیصد رہنے کا امکان ہے۔ اس رپورٹ میں یہ بھی کہا گیا کہ آئندہ مالی سال 27-2026 میں ہندوستان کی معاشی شرح نمو سلو ہو کر 6.5 فیصد رہ سکتی ہے۔

ورلڈ بینک جی ڈی پی کا یہ تخمینہ اس تصور پر مبنی ہے کہ امریکہ کا 50 فیصد درآمدی ڈیوٹی اس دوران نافذ رہے گا۔ رپورٹ میں کہا گیا ہے، ’’اس کے باوجود امید ہے کہ ہندوستان دنیا کی سب سے بڑی معیشتوں میں سب سے تیز شرح نمو برقرار رکھے گا۔‘‘

اس کے علاوہ رپورٹ میں کہا گیا، ’’مالی سال 28-2027 میں شرح نمو بڑھ کر 6.6 فیصد ہونے کی امید ہے، جسے مضبوط سروس سرگرمیوں کے ساتھ ہی برآمدات میں بہتری اور سرمایہ کاری میں تیزی سے حمایت ملے گی۔‘‘

ہندوستھان سماچار

---------------

ہندوستان سماچار / انظر حسن