نئی دہلی، 11 جنوری (ہ س)۔

دہلی میٹرو کے ہوائی اڈے ایکسپریس لائن پر پیر کی صبح اس وقت افراتفری پھیل گئی جب شرپسندوں کے ذریعہ سگنلنگ کیبل کاٹ دی گئیں۔ دہلی میٹرو ریل کارپوریشن (ڈی ایم آر سی) کے مطابق، یشوبھومی دوارکا سیکٹر-25 لائن پر دھولا کنواں اور شیواجی اسٹیڈیم میٹرو اسٹیشنوں کے درمیان تقریباً 800 میٹر سگنلنگ کیبل کو نقصان پہنچا، جو کہ نئی دہلی اور دھولا کنواں کے درمیان چلتی ہے۔

ڈی ایم آر سی نے کہا کہ چور تاروں کو کاٹنے میں کامیاب رہے لیکن انہیں چوری کرنے میں ناکام رہے۔ معائنہ کے دوران، کٹی ہوئی تاریں میٹرو کے ستونوں کے قریب پڑی ہوئی پائی گئیں۔ اس واقعے نے سگنلنگ سسٹم میں خلل ڈالا، جس کے نتیجے میں نئی دہلی کی طرف جانے والی دھولا کنواں اور شیواجی اسٹیڈیم کے درمیان اپ لائن پر ٹرین کی رفتار کو احتیاطی طور پر 25 کلومیٹر فی گھنٹہ تک کم کر دیا گیا۔ تاہم، ائیرپورٹ ایکسپریس لائن کے باقی حصوں پر میٹرو خدمات معمول کے مطابق چل رہی ہیں۔

ڈی ایم آر سی کے پرنسپل ایگزیکٹو ڈائریکٹر (کارپوریٹ کمیونیکیشنز) انوج دیال نے بتایا کہ ٹرینیں عام طور پر ایئرپورٹ ایکسپریس لائن پر ہر 10 منٹ پر چلتی ہیں۔ انہوں نے مزید کہا کہ دن کے وقت سگنلنگ کیبلز کو تبدیل کرنے سے مسافروں کو زیادہ تکلیف ہو سکتی ہے، اس لیے ریونیو سروسز ختم ہونے کے بعد مرمت اور کیبل کی تبدیلی کا کام رات کو کیا جائے گا۔ اس کے لیے دن بھر تمام ضروری تیاریاں کی جا رہی ہیں۔

مسافروں کو صورتحال سے آگاہ کرنے کے لیے اسٹیشنوں اور ٹرینوں میں مسلسل اعلانات کیے جا رہے ہیں۔ ڈی ایم آر سی نے مسافروں سے اپیل کی ہے کہ وہ اس کے مطابق اپنے سفر کی منصوبہ بندی کریں، کیونکہ متاثرہ حصے میں سفر کا وقت تھوڑا زیادہ ہو سکتا ہے۔

ڈی ایم آر سی نے اس واقعہ پر افسوس کا اظہار کیا اور کہا کہ اس طرح کی کیبل چوری نہ صرف میٹرو آپریشن میں خلل ڈالتی ہے بلکہ مسافروں کی حفاظت اور سہولت کے لیے بھی ایک سنگین چیلنج ہے۔ میٹرو انتظامیہ نے کہا کہ مستقبل میں ایسے واقعات کو مو¿ثر طریقے سے روکنے کے لیے متعلقہ اداروں کے ساتھ تال میل جاری ہے۔ قابل ذکر ہے کہ ماضی میں سگنلنگ کیبل چوری کے واقعات سے میٹرو خدمات متاثر ہوئی ہیں۔

ہندوستھان سماچار

ہندوستان سماچار / عطاءاللہ