جموں, 11 جنوری (ہ س)۔ انٹیلی جنس ایجنسیوں کی جانب سے کنچک علاقے میں مشتبہ سیٹلائٹ فون رابطے کی اطلاع ملنے کے بعد اتوار کو سیکورٹی فورسز نے بڑے پیمانے پر تلاشی آپریشن شروع کر دیا۔ حکام کے مطابق یہ رابطہ مبینہ طور پر دہشت گردوں کی جانب سے تھورایا سیٹلائٹ ڈیوائس کے ذریعے کیا گیا تھا۔اطلاع ملتے ہی جموں و کشمیر پولیس کے اسپیشل آپریشنز گروپ ، بارڈر سیکورٹی فورس، سینٹرل ریزرو پولیس فورس اور فوج نے مشترکہ طور پر علاقے میں تلاشی مہم شروع کی۔ کنچک، جموں کے مضافاتی علاقے میں واقع ہے، بین الاقوامی سرحد سے محض ایک کلومیٹر کے فاصلے پر ہے اور ماضی میں دہشت گردوں کی دراندازی کے لیے استعمال ہوتا رہا ہے۔

حکام کے مطابق پورے علاقے کو گھیرے میں لے لیا گیا ہے اور سرچ آپریشن بدستور جاری ہے۔ اس کے ساتھ ساتھ جموں کے دیگر علاقوں، بالخصوص بلند پہاڑی خطوں میں بھی سرچ اینڈ کارڈن آپریشنز میں تیزی لائی گئی ہے تاکہ خطے میں سرگرم مبینہ طور پر تقریباً تین درجن دہشت گردوں کا سراغ لگا کر انہیں بے اثر کیا جا سکے۔حکام کا کہنا ہے کہ یہ سخت اقدامات آئندہ یومِ جمہوریہ کے موقع پر امن و امان کو یقینی بنانے کے لیے کیے جا رہے ہیں۔

ہندوستھان سماچار

---------------

ہندوستان سماچار / محمد اصغر