جموں, 10 جنوری (ہ س)۔ سوشل میڈیا پر سرمائی تعطیلات میں توسیع سے متعلق گردش کرنے والی قیاس آرائیوں کے درمیان متعلقہ حکام نے ہفتہ کے روز واضح کیا ہے کہ جموں کے سمر زون میں واقع تمام سرکاری و نجی اسکول طے شدہ شیڈول کے مطابق 12 جنوری سے دوبارہ کھلیں گے اور سرمائی تعطیلات میں کسی قسم کی مزید توسیع نہیں کی گئی ہے۔حکام کے مطابق تدریسی عملہ پہلے ہی اپنی ڈیوٹیوں پر واپس آ چکا ہے اور اساتذہ کو ہفتہ کے روز اسکولوں میں حاضری یقینی بنانے کی ہدایت دی گئی تھی۔ انہوں نے تصدیق کی کہ اساتذہ اپنی اپنی تعلیمی اداروں میں موجود ہیں، جبکہ طلبہ 12 جنوری سے تعلیمی کیلنڈر کے مطابق کلاسوں میں شریک ہوں گے۔

یہ وضاحت ان غیر مصدقہ خبروں کے بعد سامنے آئی ہے جو سوشل میڈیا پر گردش کر رہی تھیں، جن میں موسم کی صورتحال کے پیش نظر جموں میں سرمائی تعطیلات میں توسیع کا دعویٰ کیا جا رہا تھا۔ حکام نے ان خبروں کو بے بنیاد قرار دیتے ہوئے والدین اور طلبہ کو غیر سرکاری اطلاعات پر بھروسہ نہ کرنے کی تلقین کی ہے۔حکام نے بتایا کہ سمر زون کے تمام سرکاری و نجی اسکولوں میں تعلیمی سرگرمیوں کی بحالی کو یقینی بنانے کے لیے تمام ضروری انتظامات مکمل کر لیے گئے ہیں۔ اسکول انتظامیہ کو بھی ہدایت دی گئی ہے کہ جاری کردہ شیڈول پر سختی سے عمل کریں اور طلبہ کی واپسی کے بعد معمول کی تعلیمی سرگرمیاں یقینی بنائیں۔

محکمہ تعلیم کے حکام نے ایک بار پھر واضح کیا کہ تعطیلات یا تعلیمی کیلنڈر میں کسی بھی قسم کی تبدیلی سے متعلق فیصلہ صرف سرکاری ذرائع کے ذریعے ہی عوام تک پہنچایا جائے گا اور عوام سے افواہوں سے گریز کرنے کی اپیل کی گئی ہے۔واضح رہے کہ جموں کے سمر زون میں سرمائی تعطیلات 10 جنوری کو اختتام پذیر ہو رہی ہیں، جبکہ طلبہ کے لیے باقاعدہ تدریسی سرگرمیوں کا آغاز 12 جنوری سے ہوگا۔

ہندوستھان سماچار

---------------

ہندوستان سماچار / محمد اصغر