جموں, 10 جنوری (ہ س)انڈین چیمبر آف کامرس (آئی سی سی) جموں کے چیئرمین راہل سہائے نے راج بھون جموں میں لیفٹیننٹ گورنر منوج سنہا سے ملاقات کی اور انہیں نئے سال کی مبارکباد پیش کی۔ملاقات کے دوران راہل سہائے نے جموں و کشمیر میں تجارت، کاروبار اور صنعتی ترقی سے متعلق متعدد امور اٹھائے، جن میں مقامی اور موجودہ صنعتوں کے مفادات کے تحفظ پر خصوصی زور دیا گیا۔ انہوں نے نیو سینٹرل سیکٹر اسکیم (این سی ایس ایس) کے تحت زیر التوا درخواستوں کو شامل کرنے اور موجودہ صنعتی یونٹس کے لیے این سی ایس ایس طرز کے فوائد پر مبنی ایک نئے صنعتی پیکیج کے اعلان کا مطالبہ کیا۔

چیئرمین آئی سی سی نے غیر ممکن کھڈ اراضی کا معاملہ بھی اٹھایا، مزدور قوانین میں انتظامی سطح پر سادگی لانے کی ضرورت پر زور دیا اور جاری بنیادی ڈھانچے کے منصوبوں میں تاخیر پر عوامی تشویش کا اظہار کیا۔ ان کا کہنا تھا کہ منصوبوں کی سست رفتاری کے باعث جموں شہر میں ٹریفک کی سنگین صورتحال پیدا ہو رہی ہے۔

راہل سہائے نے فروٹ منڈی، ٹرانسپورٹ نگر اور باہو پلازہ کے لیے جے ڈی اے لیز میں توسیع کا مطالبہ کیا اور عوام دوست ماسٹر پلان کی تیاری پر زور دیا، جس میں تمام متعلقہ فریقوں کی وسیع شمولیت کو یقینی بنایا جائے۔ انہوں نے پولیس اور عوام کے درمیان بہتر رابطے کے لیے اقدامات کو مزید مضبوط بنانے کی بھی تجویز پیش کی تاکہ سماجی ہم آہنگی کو فروغ دیا جا سکے۔لیفٹیننٹ گورنر منوج سنہا نے تمام امور کو بغور سنا اور یقین دلایا کہ انتظامیہ تجارت، صنعت اور عوام سے متعلق جائز مسائل کو مجموعی ترقی اور عوامی مفاد کو پیش نظر رکھتے ہوئے منظم اور وقت مقررہ کے اندر حل کرنے کے لیے پُرعزم ہے۔

ہندوستھان سماچار

---------------

ہندوستان سماچار / محمد اصغر