بھوپال، 10 جنوری (ہ س)۔ راجدھانی بھوپال کے راجہ بھوج ایئرپورٹ پر مسافروں کے لیے بڑی راحت کی خبر ہے۔ یہاں جدید ترین کیٹیگری-2 انسٹرومنٹ لینڈنگ سسٹم (آئی ایل ایس-2) نصب کر دیا گیا ہے۔ اس سسٹم کے چالو ہونے سے خراب موسم، کوہرا اور کم ویزیبلٹی کی صورتحال میں پروازوں کے تاخیر ہونے یا منسوخ ہونے کے مسئلے پر کافی حد تک روک لگے گی۔

ایئرپورٹ حکام کے مطابق، اب طیارہ پائلٹوں کو رن وے سے تقریباً 350 میٹر کی دوری تک بھی محفوظ لینڈنگ کی سہولت مل سکے گی۔ اس سے خاص طور پر سردیوں کے موسم میں ہونے والی پروازوں کی تاخیر کا مسئلہ کم ہوگا۔ گزشتہ دسمبر-جنوری کے دوران بھوپال ایئرپورٹ پر کوہرے اور موسم خراب ہونے کے سبب کئی پروازیں وقت پر لینڈنگ نہیں کر پاتی تھیں۔

آئی ایل ایس-2 سسٹم کے آپریشن سے پہلے اس کے لیے ایئرپورٹ ملازمین اور متعلقہ اسٹاف کو خصوصی تربیت بھی دی گئی ہے۔ یہ سسٹم فی الحال ملک کے منتخب ایئرپورٹس پر ہی دستیاب ہے اور مدھیہ پردیش میں اسے نصب کرنے والا راجہ بھوج ایئرپورٹ پہلا ایئرپورٹ بن گیا ہے۔

ایئرپورٹ اتھارٹی آف انڈیا (اے اے آئی) گزشتہ تین سالوں سے بھوپال ایئرپورٹ پر موسم سے متعلق آلات اور تکنیکی سہولیات کو جدید بنانے کی سمت میں کام کر رہی تھی۔ پہلے آلات کی تنصیب کے لیے ضروری زمین دستیاب نہیں ہونے کے سبب کام میں تاخیر ہوئی، لیکن اب عمل مکمل ہونے کے بعد نیا سسٹم پوری طرح فعال کر دیا گیا ہے۔

حکام کا کہنا ہے کہ آئی ایل ایس-2 کے ذریعے پائلٹوں کو خودکار موسم اپ ڈیٹ اور درست لینڈنگ جانکاری ملتی رہے گی، جس سے مسافروں کی حفاظت کے ساتھ ساتھ پروازوں کی باقاعدگی بھی بہتر ہوگی۔

ہندوستھان سماچار

---------------

ہندوستان سماچار / انظر حسن