ناندیڑ ، 9 دسمبر (ہ س)۔ ناندیڑ لوکل کرائم برانچ نے شہر میں غیر قانونی اسلحہ رکھنے والوں کے خلاف کارروائی کرتے ہوئے ایک پستول اور دو زندہ کارتوس برآمد کیے۔ گشت کے دوران امبیڈکر نگر علاقے میں مشتبہ افراد کو پکڑ کر جب تلاشی لی گئی تو ایک ملزم کے پاس سے بغیر لائسنس دیہاتی پستول اور کارتوس ملے۔ پولیس نے موقع سے تین افراد کو حراست میں لیا اور انہیں شیواجی نگر پولیس اسٹیشن لے جایا گیا۔
پولیس نے بتایا کہ ضلع بھر میں مفرور اور ناقابل ضمانت وارنٹ ملزمان، غیر قانونی ہتھیار رکھنے والوں اور جیل سے رہائی پانے والے افراد کے خلاف کومبنگ آپریشن تیزی سے جاری ہے۔ اسی آپریشن کے تحت تیمینہ نگر علاقے میں پولیس کی موجودگی میں دو خنجر بھی ضبط کیے گئے۔
اس کارروائی کی قیادت لوکل کرائم برانچ کے پولس انسپکٹر اُدے کھنڈرائی نے کی، جبکہ پولس سب انسپکٹر ملند سون کامبلے اور ان کی ٹیم نے موقع پر کارروائی انجام دی۔ دونوں برآمدگیوں کے سلسلے میں شیواجی نگر پولیس نے دو معاملات درج کیے ہیں۔ پولیس کے مطابق تفتیش آگے بڑھ رہی ہے اور دیگر رابطوں کی بھی جانچ کی جا رہی ہے۔
ہندوستھان سماچار
ہندوستان سماچار / جاوید این اے
10 Dec 2025
