ناگپور ، 8 دسمبر (ہ س)۔ مہاراشٹر کی مقننہ کا سرمائی اجلاس پیر کو ناگپور میں شروع ہوا، لیکن انڈیگو ایئر لائنز میں پروازوں کی منسوخی، تاخیر اور ری شیڈولنگ نے قانون سازوں کے سفر کو شدید متاثر کیا، جس کے نتیجے میں اجلاس کی کارروائی افتتاحی روز ہی چند گھنٹے جاری رہنے کے بعد ملتوی کر دی گئی۔

انڈیگو کی متعدد پروازیں اچانک منسوخ ہو جانے کے باعث کئی اراکین اسمبلی اور کونسل مختلف شہروں کے ہوائی اڈوں پر رکے رہے۔ کچھ سینئر سیاسی لیڈروں نے فوری طور پر چارٹرڈ ہوائی جہازوں کا انتظام کرکے ناگپور پہنچنے میں کامیابی حاصل کی، جبکہ دیگر ارکان کے آئندہ دو دن میں ٹرین یا سڑک کے ذریعے پہنچنے کی امید ہے۔

غیر حاضری کی بڑی تعداد کے باعث دونوں ایوانوں میں صرف ابتدائی اور رسمی امور نمٹائے گئے اور بعدازاں پورے دن کے لیے کارروائی ملتوی کر دی گئی۔ اجلاس کے آغاز پر ہی کم حاضری نے مقننہ کی سرگرمیوں کی رفتار کو محدود کر دیا۔

سرمائی اجلاس کے آنے والے دنوں میں ریاست کے اہم سیاسی اور انتظامی امور پر شدید بحث متوقع ہے۔

ہندوستھان سماچار

--------------------

ہندوستان سماچار / جاوید این اے