مالیگاؤں میں نقلی آدھار کارڈ بنانے کا شبہ، دو مراکز پر کارروائی, چار افراد زیر حراستمالیگاؤں، 8 دسمبر (ہ س)۔ شہر میں فرضی آدھار کارڈ تیار کیے جانے کے شبہے نے قانون نافذ کرنے والے اداروں کو متحرک کر دیا ہے۔ سٹی پولیس، مقامی کرائم برانچ اور ریونیو ڈپارٹمنٹ کی ٹیم نے پیر کو اسلام پورہ اور پوار واڑی علاقوں میں قائم دو مراکز پر چھاپے مارے، جہاں سے مشکوک آدھار دستاویزات برآمد ہوئیں۔ کارروائی کے دوران چار افراد کو حراست میں لے کر ان سے پوچھ گچھ کی جا رہی ہے۔

تحقیقات سے معلوم ہوا ہے کہ ان مراکز پر دیگر ریاستوں کی شناختی دستاویزات کا استعمال کرتے ہوئے آدھار کارڈ بنائے جا رہے تھے، جس سے شناختی نظام کے ممکنہ غلط استعمال کا خدشہ ظاہر کیا جا رہا ہے۔ اسلام پورہ میں واقع مرکز دراصل ایک زیراکس سنٹر تھا جو بغیر کسی سرکاری منظوری کے شہریوں کے آدھار کارڈ بنا رہا تھا۔

ٹیموں نے چھاپہ مار کارروائی کے دوران کمپیوٹر سسٹم، زیر کار آدھار درخواستیں، شناختی نقول اور دیگر متعلقہ ریکارڈ ضبط کیے ہیں۔ پولیس کا کہنا ہے کہ معاملے کے پس منظر میں پہلے سے جاری فرضی برتھ سرٹیفکیٹ گھوٹالا بھی زیر تفتیش ہے، جس کے کچھ روابط آدھار فراڈ سے جڑ سکتے ہیں۔

اسسٹنٹ سپرنٹنڈنٹ آف پولیس سدھارتھ بروال نے بتایا کہ حقائق کی مکمل تصدیق کے بعد مناسب دفعات کے تحت مقدمہ درج کیا جائے گا۔ انہوں نے کہا کہ شناختی فراڈ کے ایسے معاملات سنگین نوعیت کے ہوتے ہیں اور ان کے خلاف سخت کارروائی کی جائے گی۔

ہندوستھان سماچار

--------------------

ہندوستان سماچار / جاوید این اے