واشنگٹن، 31 دسمبر (ہ س)۔ امریکہ نے ایران اور وینزویلا کے درمیان مبینہ ہتھیاروں کی تجارت کو لے کر سخت قدم اٹھاتے ہوئے 10 افراد اور اداروں پر نئی پابندیاں عائد کی ہیں۔ امریکی ٹریژری ڈپارٹمنٹ نے منگل کو بتایا کہ یہ پابندیاں ایران کے جارحانہ ہتھیاروں کے پروگرام سے مربوط ہونے کے الزام میں لگائی گئی ہیں۔

ٹریژری ڈپارٹمنٹ کے مطابق، وینزویلا واقع ایمپریسا ایروناٹیکا نیسیونال ایس اے (ای اے این ایس اے) اور اس کے چیئرمین جوس جیسس اردانیتا گونزالیج کو پابندی کی فہرست میں شامل کیا گیا ہے۔ امریکہ کا الزام ہے کہ ان دونوں نے ایران اور وینزویلا کے درمیان بغیر پائلٹ ہوائی گاڑی (یو اے وی)، یعنی ڈرون کی تجارت میں کردار ادا کیا۔

بیان میں کہا گیا کہ اردانیتا نے ای اے این ایس اے کی جانب سے وینزویلا اور ایران کی مسلح افواج کے افسران کے ساتھ تال میل کر کے وینزویلا میں ڈرون پروڈکشن کو آگے بڑھایا۔

ٹریژری ڈپارٹمنٹ میں دہشت گردی اور مالیاتی خفیہ معاملات کے انڈر سکریٹری جان ہرلی نے کہا کہ امریکہ ایران کے فوجی صنعتی نظام کو امریکی مالیاتی نظام تک رسائی سے محروم کرنے کے لیے تیز اور فیصلہ کن کارروائی کرتا رہے گا۔

حالیہ مہینوں میں امریکہ نے وینزویلا پر دباو بڑھایا ہے اور جنوبی کیریبین خطے میں بڑے پیمانے پر فوجی تعیناتی کی ہے۔ اس کے ساتھ ہی صدر نکولس مادورو، ان کے خاندان اور ساتھیوں پر بھی پابندیاں عائد کی گئی ہیں۔

ہندوستھان سماچار

---------------

ہندوستان سماچار / انظر حسن