ڈھاکہ، 31 دسمبر (ہ س)۔ بنگلہ دیش نیشنلسٹ پارٹی (بی این پی) کے کارگزار صدر طارق رحمان نے اپنی ماں سابق وزیر اعظم خالدہ ضیاء کے انتقال پر انہیں جذباتی خراج عقیدت پیش کیا۔ طارق نے انہیں بااثر قومی رہنما اور پیاری ماں کے طور پر یاد کیا۔ بی این پی صدر خالدہ کا کل صبح ڈھاکا کے ایور کیئر اسپتال میں علاج کے دوران انتقال ہو گیا تھا۔ آج انہیں سپرد خاک کیا جائے گا۔

دی ڈیلی اسٹار کی رپورٹ کے مطابق، طارق نے فیس بک پوسٹ میں کہا کہ خالدہ ضیاء کی عوامی زندگی قربانی اور جدوجہد سے بھری ہوئی ہے۔ وہی گھر اور خاندان کی سب سے سچی سرپرست تھیں۔ انہوں نے لکھا، ”ان کے بے پناہ پیار نے ہمیں ہمارے سب سے مشکل لمحوں میں طاقت دی۔“ خالدہ کے بڑے بیٹے طارق نے کہا، ”کئی لوگوں کے لیے وہ ملک کی رہنما تھیں، بغیر سمجھوتہ کرنے والی رہنما، جمہوریت کی ماں، بنگلہ دیش کی ماں تھیں۔“

انہوں نے کہا کہ ملک کو ان کی کمی محسوس ہوگی۔ سیاسی جدوجہد کے دنوں کو یاد کرتے ہوئے طارق نے کہا کہ ان کی ماں کو کئی بار گرفتار کیا گیا۔ انہیں طبی سہولت سے محروم رکھا گیا۔ ماں نے اسے سہا۔ درد، قید اور غیر یقینی صورتحال کے باوجود ماں نے ہمت اور ہمدردی کے ساتھ اپنے خاندان کی حفاظت کی۔

مرحوم صدر اور بی این پی بانی ضیاء الرحمان اور چھوٹے بھائی عرفات رحمان کوکو کا ذکر کرتے ہوئے طارق نے کہا کہ ماں نے ملک کی خدمت میں اپنے شوہر اور بیٹے کو کھونے کا درد سہا۔ انہوں نے کہا، ”اس نقصان میں بنگلہ دیش اور اس کے شہری ماں کی روح بن گئے۔“ طارق نے کہا، ”وہ حب الوطنی، قربانی اور مزاحمت کی ناقابل فراموش وراثت چھوڑ گئی ہیں۔ ایک ایسی وراثت جو بنگلہ دیش کے جمہوری شعور میں ہمیشہ زندہ رہے گی۔“ طارق نے ملک و بیرون ملک کے ان سبھی لوگوں کا شکریہ ادا کیا جنہوں نے ماں کے انتقال پر تعزیت کا اظہار کیا۔

ہندوستھان سماچار

---------------

ہندوستان سماچار / انظر حسن