جموں, 30 دسمبر (ہ س)۔ وزیر خوراک، شہری رسد و امور صارفین ستیش شرما نے یقین دلایا کہ کشمیر ٹورسٹ ڈرائیورز کوآرڈینیشن کمیٹی کی جانب سے اٹھائے گئے تمام حقیقی مسائل کو کم سے کم وقت میں حل کیا جائے گا۔یہ یقین دہانی جموں میں منعقدہ ایک تفصیلی اجلاس کے دوران کرائی گئی، جس میں ایم ایل اے ایم وائی تاریگامی، صدر سی آئی ٹی یو کے علاوہ سکریٹری ٹرانسپورٹ اونی لاوسا اور محکمہ ٹرانسپورٹ کے سینئر افسران نے شرکت کی۔ اجلاس میں کشمیر ٹورسٹ ڈرائیورز کوآرڈینیشن کمیٹی کے نمائندے بھی موجود تھے۔

اجلاس کے دوران کوآرڈینیشن کمیٹی نے کشمیر میں سیاحتی ٹیکسی چلانے والے ڈرائیوروں کو درپیش مختلف سنگین مسائل سے متعلق ایک جامع میمورنڈم پیش کیا۔ کمیٹی کا ایک اہم مطالبہ سیاحتی ٹیکسیوں کے لیے یکساں کلر کوڈنگ سسٹم متعارف کرانا تھا، جیسا کہ دہلی، مہاراشٹر اور دیگر ریاستوں میں نافذ ہے۔

کمیٹی کے مطابق معیاری رنگوں کا نظام سیاحوں اور مسافروں کو مجاز گاڑیوں کی آسانی سے شناخت میں مدد دے گا، سلامتی اور تحفظ کو یقینی بنائے گا اور غیر مجاز و جعلی ٹیکسیوں کے بڑھتے ہوئے رجحان پر قابو پانے میں معاون ثابت ہوگا۔ اس کے علاوہ اس اقدام سے شعبے میں ضابطہ کاری، شفافیت اور پیشہ ورانہ معیار کو فروغ ملے گا۔

کمیٹی نے اس بات پر بھی زور دیا کہ سیاحتی ٹیکسی شعبہ کشمیر میں سیاحت، روزگار اور مقامی ذریعہ معاش کو سہارا دینے میں کلیدی کردار ادا کرتا ہے، لہٰذا اس شعبے کے مؤثر اور پائیدار کام کے لیے مضبوط اور معاون پالیسی فریم ورک ناگزیر ہے۔وزیر ستیش شرما نے تمام مسائل کو غور سے سنا اور وفد کو یقین دلایا کہ حکومت سیاحتی ڈرائیوروں کے مسائل کے تئیں حساس ہے۔ انہوں نے کہا کہ چونکہ بعض مطالبات پالیسی سطح کے فیصلوں سے متعلق ہیں، اس لیے محکمہ ٹرانسپورٹ فوری طور پر مشاورت اور ضروری کارروائی کا آغاز کرے گا تاکہ دو ہفتوں کے اندر ان مسائل کا حل نکالا جا سکے۔

وزیر نے افسران کو ہدایت دی کہ تجاویز کا وقت مقررہ کے اندر جائزہ لیا جائے اور تمام متعلقہ فریقوں کے ساتھ قریبی تال میل قائم رکھتے ہوئے فیصلوں پر مؤثر عمل درآمد کو یقینی بنایا جائے۔اجلاس میں سی آئی ٹی یو جموں و کشمیر کے سکریٹری عبدالراشد پنڈت، چیئرمین کے ٹی سی محمد یونس اور کشمیر ٹورسٹ ڈرائیورز کوآرڈینیشن کمیٹی کے صدر مدثر احمد نے تنظیم کی نمائندگی کی اور وزیر کی مثبت یقین دہانی پر اطمینان کا اظہار کیا۔

ہندوستھان سماچار

---------------

ہندوستان سماچار / محمد اصغر