خطے میں جامع اور جدید ٹیکنالوجی پر مبنی سیکورٹی انتظامات کیے گئے: آئی جی پی

جموں،28 دسمبر(ہ س)۔

انسپکٹر جنرل آف پولیس (آئی جی پی) جموں بھیم سین توتی نے کہا ہے کہ نئے سال کی تقریبات کو محفوظ اور پُرامن بنانے کے لیے پورے خطے میں جامع اور جدید ٹیکنالوجی پر مبنی سیکورٹی انتظامات کیے گئے ہیں۔میڈیا سے گفتگو کرتے ہوئے آئی جی پی توتی نے کہا کہ پولیس ہر سال کوشش کرتی ہے کہ سیکورٹی انتظامات کو پچھلے برسوں کے مقابلے مزید مؤثر بنایا جائے۔ انہوں نے کہا کہ اس مرتبہ کئی نئے اقدامات متعارف کرائے گئے ہیں اور لیفٹیننٹ گورنر نے بھی علاقے کا دورہ کر کے سیکورٹی صورتحال کا جائزہ لیا اور حفاظت و ہجوم کے نظم و نسق سے متعلق اہم ہدایات جاری کیں۔

انہوں نے بتایا کہ گزشتہ برس سے ہجوم کے انتظام اور یاترا سے متعلق سیکورٹی میں ٹیکنالوجی کے استعمال سے مجموعی انتظامات کو خاصی تقویت ملی ہے۔ سی سی ٹی وی کیمروں کے استعمال کو مزید مؤثر اور جدید بنایا گیا ہے، جبکہ ڈیٹا اینالیٹکس کے ذریعے بھیڑ کے خدشات والے مقامات پر بروقت کارروائی کو یقینی بنایا جا رہا ہے.آئی جی پی کے مطابق پورے ٹریک پر تقریباً 550 سی سی ٹی وی کیمرے نصب کیے گئے ہیں اور ایک مخصوص تکنیکی ٹیم کنٹرول روم سے براہِ راست نگرانی کر رہی ہے۔ انہوں نے کہا کہ شرائن بورڈ، پولیس اور دیگر متعلقہ محکموں کے افسران ایک ہی مقام پر تعینات ہیں اور کسی بھی الرٹ یا تجزیاتی رپورٹ پر فوری کارروائی عمل میں لائی جاتی ہے۔ انہوں نے مزید کہا کہ سی سی ٹی وی فیڈ، آر ایف آئی ڈی سسٹم اور وائرلیس کنیکٹیوٹی سمیت تمام تکنیکی نظاموں کو ایک مرکزی کنٹرول روم سے مربوط کرنے کی کوشش کی جا رہی ہے تاکہ بہتر ہم آہنگی اور مؤثر انتظام ممکن ہو سکے۔

منشیات اور نارکو دہشت گردی کے حوالے سے بات کرتے ہوئے آئی جی پی توتی نے کہا کہ منشیات کے خلاف جنگ ایک طویل المدتی مہم ہے۔حالیہ دنوں میں منشیات کے خلاف جو کارروائیاں دیکھنے میں آئی ہیں وہ ایک وسیع مہم کا صرف ایک حصہ ہیں، جبکہ آنے والے دنوں میں منشیات کے نیٹ ورکس کے خلاف مزید سخت اور مربوط کارروائیاں کی جائیں گی۔

ہندوستھان سماچار

ہندوستان سماچار / محمد اصغر