نئی دہلی، 25 دسمبر (ہ س)۔

پولیس نے جنوبی ضلع کے ساکیت علاقے میں ایک بزرگ شہری کے گھر میں ہونے والی چوری کا معمہ حل کر لیا ہے۔ جنوبی ضلع اے اے ٹی ایس اور مقامی پولیس کی ایک مشترکہ ٹیم نے دو بدنام چوروں اور ایک خاتون کو گرفتار کیا جنہوں نے مبینہ طور پر چوری کے سامان کو ٹھکانے لگایا اور ان کے قبضے سے تقریباً 21 لاکھ روپے مالیت کے سونے اور ہیرے کے زیورات برآمد کئے۔

جنوبی ضلع کے ڈپٹی کمشنر آف پولیس انکت چوہان نے جمعرات کو بتایا کہ 31 اکتوبر کو ساکیت میں ایس ایف ایس فلیٹ میں رہنے والے ایک بزرگ شہری نے شکایت کی تھی کہ نامعلوم چور ان کے گھر میں گھس کر سونے اور ہیرے کے زیورات، گھڑیاں، پرفیوم اور دیگر قیمتی سامان چوری کر کے لے گئے ہیں۔ جس کے بعد ساکیت پولس تھانہ نے کیس درج کرکے تحقیقات شروع کردی۔

معاملے کی سنگینی کو دیکھتے ہوئے جنوبی ضلع اے ٹی ایس اور ساکیت پولیس اسٹیشن کی مشترکہ ٹیم تشکیل دی گئی۔ ٹیم نے سی سی ٹی وی فوٹیج، تکنیکی شواہد اور مقامی معلومات کی بنیاد پر تحقیقات کی۔ فوٹیج میں ایک مشتبہ شخص کی شناخت شیوم سونکر عرف سیبو کے طور پر ہوئی ہے جو جہانگیر پوری کا رہنے والا ہے۔ اسے 16 دسمبر 2025 کو ایک چھاپے کے بعد گرفتار کیا گیا تھا۔ پوچھ گچھ کے دوران اس کے ساتھی آکاش شرما کو بھی گرفتار کیا گیا۔

ملزم نے انکشاف کیا کہ چوری شدہ زیورات پنجاب کے شہر امرتسر میں کرائے کے مکان میں چھپائے گئے تھے۔ اس کے بعد پولس ٹیم نے امرتسر کے موہنی پارک علاقے میں چھاپہ مار کر چوری کئے گئے سونے اور ہیرے کے زیورات، گھڑیاں اور پرفیوم برآمد کر لیا۔ متھوت فائنانس کی پوتلیگھر برانچ میں گروی رکھی ہوئی سونے کی چین بھی برآمد ہوئی۔ چوری کا سامان خریدنے والی خاتون کو بھی گرفتار کر لیا گیا ہے۔

ضبطی میں کل 131.41 گرام سونے کے زیورات شامل ہیں، جن میں پانچ چوڑیاں، دو چین، ایک منگل سوتر، ایک لاکٹ، ہیرے کی بالیاں، کلائی کی گھڑی اور ڈیزائنر پرفیوم کی ایک بوتل شامل ہے۔

پولیس کے مطابق مرکزی ملزم شیوم سونکر عرف سیبو اس سے قبل دہلی میں چوری کی کئی وارداتوں میں ملوث رہا ہے۔ اس کا ساتھی آکاش شرما بھی اس جرم میں سرگرم تھا۔ خاتون ملزم چوری کے سامان کو ٹھکانے لگانے میں ان کی مدد کر رہی تھی۔ ساو¿تھ ڈسٹرکٹ پولیس کے سینئر حکام نے بتایا کہ مزید تفتیش جاری ہے اور ملزمان کے مجرمانہ ریکارڈ کی جانچ کی جارہی ہے۔

ہندوستھان سماچار

ہندوستان سماچار / عطاءاللہ