نئی دہلی، 24 دسمبر (ہ س)۔ قومی شاہراہ اتھارٹی آف انڈیا (این ایچ اے آئی) کے تحت کام کرنے والے ہائی وے انفرا انویسٹمنٹ ٹرسٹ کو سیکیورٹیز اینڈ ایکسچینج بورڈ (سیبی) کی جانب سے پبلک انفراسٹرکچر انویسٹمنٹ ٹرسٹ کے طور پر منظوری مل گئی ہے۔ اس منظوری سے قومی شاہراہوں کے اثاثوں کی مونیٹائزیشن کی صلاحیت میں اضافہ ہوگا اور گھریلو ریٹیل سرمایہ کاروں کے لیے طویل مدتی اور اعلیٰ معیار کا سرمایہ کاری کا ذریعہ دستیاب ہو سکے گا۔

مرکزی وزارتِ سڑک ٹرانسپورٹ اور شاہراہوں کے مطابق، این ایچ اے آئی نے اس سے قبل ہائی وے انفرا انویسٹمنٹ مینیجرز پرائیویٹ لمیٹڈ کو ہائی وے انفرا انویسٹمنٹ ٹرسٹ کا سرمایہ کاری مینیجر مقرر کیا تھا۔ اس کمپنی میں اسٹیٹ بینک آف انڈیا، پنجاب نیشنل بینک، نَبافِڈ، ایکسس بینک، بجاج فِن سرو وینچرز، ایچ ڈی ایف سی بینک، آئی سی آئی سی آئی بینک، آئی ڈی بی آئی بینک، انڈس اِنڈ بینک اور یس بینک جیسی معروف مالیاتی اداروں کی ایکویٹی شراکت داری شامل ہے۔ این ایچ اے آئی کے ممبر (فنانس) این آر وی وی ایم کے راجندر کمار کو کمپنی کا منیجنگ ڈائریکٹر اور چیف ایگزیکٹو آفیسر (اضافی چارج) مقرر کیا گیا ہے۔

این ایچ اے آئی کے چیئرمین سنتوش کمار یادو نے کہا کہ سیبی کی منظوری قومی شاہراہوں کے بنیادی ڈھانچے کی ترقی میں عوامی شراکت بڑھانے کی سمت ایک اہم قدم ہے۔ انہوں نے مزید کہا کہ ہائی وے انفرا انویسٹمنٹ مینیجرز پرائیویٹ لمیٹڈ کی سینئر قیادت ٹیم تجربہ کار اور قابل پیشہ ور افراد پر مشتمل ہے، جو اس پہل کو آگے بڑھانے اور عوام کے لیے طویل مدتی سرمایہ کاری کے مواقع پیدا کرنے کی پوری صلاحیت رکھتی ہے۔

ہندوستھان سماچار

---------------

ہندوستان سماچار / عبدالواحد