شری ہری کوٹا (آندھرا پردیش)، 24 دسمبر (ہ س)۔ بھارتی خلائی تحقیقاتی تنظیم (اسرو) نے شری ہری کوٹا کے خلائی مرکز سے ایک اہم اور پرعزم مواصلاتی سیٹلائٹ کامیابی کے ساتھ لانچ کیا۔ صبح 8:54 بجے ایل وی ایم3-ایم6 راکٹ کے ذریعے بلو برڈ بلاک-2 نامی سیٹلائٹ کو خلا میں روانہ کیا گیا۔

یہ لانچ نیو اسپیس انڈیا لمیٹڈ (این ایس آئی ایل) اور امریکہ کی کمپنی اے ایس ٹی اسپیس موبائلکے درمیان طے پانے والے معاہدے کے تحت کیا گیا۔ این ایس آئی ایل، اسرو کی تجارتی شاخ ہے۔ اسرو کے مطابق، یہ مواصلاتی سیٹلائٹ تقریباً 6,100 کلوگرام وزنی ہے، جو اب تک ایل وی ایم3 راکٹ کے ذریعے زمین کے نچلے مدار میں بھیجا جانے والا سب سے بھاری سیٹلائٹ ہے۔

اے ایس ٹی اسپیس موبائل کے مطابق، یہ اگلے سلسلے کا مواصلاتی سیٹلائٹ بلو برڈ بلاک-2 دنیا بھر کے اسمارٹ فونز کو براہِ راست 24/7 ہائی اسپیڈ سیلولر براڈ بینڈ فراہم کرنے کے لیے تیار کیا گیا ہے۔ اس سیٹلائٹ میں 223 مربع میٹر کا فیزڈ اَرے موجود ہے، جو اسے لو ارتھ آربٹ میں تعینات کیا جانے والا اب تک کا سب سے بڑا تجارتی مواصلاتی سیٹلائٹ بناتا ہے۔

یہ اسرو کا 101 واں مشن ہے۔ یہ تاریخی مشن اگلی نسل کے ایسے مواصلاتی سیٹلائٹ کی بنیاد رکھے گا، جو دنیا بھر میں براہِ راست اسمارٹ فونز کو تیز رفتار سیلولر براڈ بینڈ سروس فراہم کرنے کے لیے تیار کیا گیا ہے۔ بلو برڈ بلاک-2 مشن کا مقصد سیٹلائٹ کے ذریعے براہِ راست موبائل کنیکٹیوٹی فراہم کرنا ہے۔ یہ نیٹ ورک دنیا میں کہیں بھی، کسی بھی وقت، سب کے لیے 4جی اور 5جی وائس و ویڈیو کالز، پیغامات، اسٹریمنگ اور ڈیٹا سروسز مہیا کرے گا۔

ہندوستھان سماچار

---------------

ہندوستان سماچار / عبدالواحد