نئی دہلی، 24 دسمبر (ہ س)۔ دہلی کی وزیر اعلیٰ ریکھا گپتا نے کہا کہ وزیر اعظم نریندر مودی کی دور اندیش، مضبوط اور فیصلہ کن قیادت میں مرکزی کابینہ کی طرف سے دہلی میٹرو کے فیز 5اے کی منظوری ایک جدید اور ترقی یافتہ دہلی کی تعمیر کی طرف ایک دور رس قدم ہے۔ انہوں نے شہری بنیادی ڈھانچے کو عالمی معیار کا بنانے کے لئے دہلی کے لوگوں کی طرف سے وزیر اعظم کا شکریہ ادا کیا۔
بدھ کو سوشل میڈیا پر ایک پوسٹ میں، وزیر اعلیٰ نے کہا کہ تقریباً 12,015 کروڑ روپے کی لاگت سے منظور ہونے والی اس 16 کلومیٹر توسیع کے ساتھ، دہلی میٹرو نیٹ ورک 400 کلومیٹر کا اہم سنگ میل عبور کرے گا، جس سے قومی راجدھانی کے شہری رابطے کو نئی بلندیوں پر لے جایا جائے گا۔ یہ اہم فیصلہ دہلی کے لوگوں کے لیے محفوظ، ہموار اور تیز رفتار نقل و حمل کو یقینی بنائے گا اور 'ایز آف لیونگ' کے عزم کو مؤثر طریقے سے پورا کرنے میں بھی اہم کردار ادا کرے گا۔
وزیراعلیٰ نے کہا کہ 13 نئے جدید ترین اسٹیشنوں کے ساتھ میٹرو کی اس توسیع سے سڑکوں پر ٹریفک کے بڑھتے ہوئے دباؤ کو کم کرنے، مسافروں کے وقت کی بچت اور ماحولیات کے تحفظ اور آلودگی کو کم کرنے میں نمایاں مدد ملے گی۔
---------------
ہندوستان سماچار / عبدالسلام صدیقی
