شام میں آئی ایس آئی ایس کے 70 ٹھکانوں پر امریکہ کے ہوائی حملے، بدلے کی کارروائی بتایا

واشنگٹن، 20 دسمبر (ہ س)۔ امریکی فوج نے جمعہ کو وسطی اور مشرقی شام کے دیہی علاقوں میں اسلامک اسٹیٹ (آئی ایس آئی ایس) کے درجنوں ٹھکانوں پر ہوائی حملے کیے۔ 13 دسمبر کو پلمائرا میں ہوئے حملے کے جواب میں یہ کارروائی کی گئی ہے، جس میں دو امریکی فوجی اور ایک مترجم کی موت ہو گئی تھی۔ امریکہ نے اسے بدلے کی کارروائی قرار دیا ہے۔ شام کی حکومت نے امریکی کارروائی کی حمایت کی ہے۔

امریکہ کے دفاعی سکریٹری پیٹ ہیگسیتھ نے سوشل میڈیا پلیٹ فارم ایکس پر کہا کہ بدلے کی کارروائی میں آئی ایس آئی ایس کے کئی جنگجو مارے گئے۔ ان کا کہنا ہے کہ آئی ایس آئی ایس کے جنگجووں، اس کے بنیادی ڈھانچے اور ہتھیار جمع کیے جانے کے ٹھکانوں کو تباہ کرنے کے مقصد کے ساتھ یہ آپریشن شروع کیا گیا۔ انہوں نے کہا کہ یہ کسی جنگ کی شروعات نہیں- انتقام کا اعلان ہے۔

پینٹاگن نے اس جوابی کارروائی کو ’’آپریشن ہاک آئی اسٹرائیک‘‘ نام دیا ہے، جو 13 دسمبر کو ہوئے حملے میں مارے گئے دو امریکی فوجیوں اور ایک مترجم کی موت کا بدلہ لینے کے لیے شروع کیا گیا ہے۔

المانیٹر نے ایک امریکی افسر کے حوالے سے بتایا ہے کہ مقامی وقت کے مطابق صبح تقریباً 2.15 بجے تک 70 سے زائد ٹھکانوں پر حملے کیے جا چکے تھے۔ جس میں امریکی فضائیہ کے ایف-15، اے-10 ٹینک بسٹر اور امریکی فوج کے اپاچے ہیلی کاپٹروں کے ساتھ زمین پر موجود امریکی ہیمارس سسٹم اور اردن کی رائل ایئر فورس کے ایف-16 طیاروں نے بھی حصہ لیا۔ ایسے بڑے حملے آنے والے گھنٹوں اور منگل کی صبح تک جاری رہ سکتے ہیں۔

امریکی صدر ڈونالڈ ٹرمپ نے 13 دسمبر کو پلمائرا میں آئے امریکی فوجی وفد پر ہوئے حملے کے لیے آئی ایس آئی ایس کو ذمہ دار ٹھہراتے ہوئے اسے اس کی سخت سزا دینے کا اعلان کیا تھا۔ امریکی سینٹرل کمانڈ (سینٹ کام) نے حملے کے لیے اکیلے آئی ایس آئی ایس کو ذمہ دار گردانا، حالانکہ آئی ایس آئی ایس نے براہ راست طور پر حملے کی ذمہ داری نہیں لی۔

ہندوستھان سماچار

---------------

ہندوستان سماچار / انظر حسن