بی ڈبلیو ایف ورلڈ ٹور فائنلز : ساتوک-چراغ کی جوڑی سیمی فائنل میں
ہانگژو، 20 دسمبر (ہ س)۔ ہندوستان کی اسٹار مردوں کی ڈبلز جوڑی ساتوک سائی راج رینکی ریڈی اور چراغ شیٹی نے سیزن کے آخری ٹورنامنٹ بی ڈبلیو ایف ورلڈ ٹور فائنلز میں اپنی شاندار کارکردگی جاری رکھتے ہوئے ناک آوٹ مرحلے میں داخلہ حاصل کر لیا ہے۔ جمعہ کو گروپ-بی کے اپنے آخری مقابلے میں انہوں نے ملیشیا کی ٹاپ جوڑی ایرون چیا اور سوہ ووئی یک کو سنسنی خیز مقابلے میں 21-17، 18-21، 15-21 سے شکست دی۔
تیسری سیڈ ہندوستانی جوڑی نے پہلا گیم گنوانے کے بعد زبردست واپسی کی اور 70 منٹ تک جاری ہائی وولٹیج مقابلے میں پیرس اولمپک برانز میڈل جیتنے والی ملیشیائی جوڑی پر دباو بنائے رکھا۔ اس جیت کے ساتھ ساتوک-چراغ سیزن کے اختتام والے اس باوقار ٹورنامنٹ کے سیمی فائنل میں پہنچنے والی پہلی ہندوستانی مردوں کی ڈبلز جوڑی بن گئی ہے۔
گروپ-بی میں واحد ناقابل شکست جوڑی رہی ساتوک اور چراغ کو سیمی فائنل میں جگہ پکی کرنے کے لیے صرف ایک گیم کی ضرورت تھی، لیکن انہوں نے اس سے کہیں آگے بڑھتے ہوئے پورے میچ پر کنٹرول کیا۔ پہلے گیم کے بعد حکمت عملی میں تبدیلی کرتے ہوئے ہندوستانی جوڑی نے بہتر پوزیشننگ اپنائی اور ریٹرن میں تنوع لا کر ملیشیائی کھلاڑیوں کا تال میل توڑ دیا۔
مقابلے کی شروعات سے ہی دونوں جوڑیوں کے درمیان تیز رفتار ریلیاں دیکھنے کو ملیں۔ پہلے گیم میں ملیشیا نے اہم موقعوں پر سبقت بنا کر بازی ماری، لیکن دوسرے گیم میں ساتوک-چراغ نے صبر اور جارحانہ کھیل کا بہترین توازن دکھایا۔ فیصلہ کن لمحات میں ہندوستانی کھلاڑیوں کے دمدار اسمیش اور درست ڈرائیوز نے میچ کو تیسرے گیم تک کھینچا اور ساتھ ہی ناک آوٹ ٹکٹ بھی پکا کر دیا۔
فیصلہ کن گیم میں خود اعتمادی سے لبریز ہندوستانی جوڑی نے ابتدائی جھٹکوں کے باوجود 9-11 کی سبقت بنائی اور پھر ریلیوں پر پوری طرح حاوی ہو گئی۔ آخر میں چراغ کی درست سروس پر سوہ کی غلطی کے ساتھ ہندوستان نے مقابلہ اپنے نام کر لیا۔
ہندوستان کا بی ڈبلیو ایف ورلڈ ٹور فائنلز میں سفر بھلے ہی محدود رہا ہو، لیکن کامیابیاں خاص رہی ہیں۔ پی وی سندھو 2018 میں خواتین سنگلز کا خطاب جیتنے والی اکلوتی ہندوستانی کھلاڑی ہیں، جبکہ سائنا نہوال 2011 میں رنر اپ رہی تھیں۔ ڈبلز زمرے میں جوالا گٹا اور وی دیجو 2009 میں مکسڈ ڈبلز کے فائنل تک پہنچے تھے۔
ہندوستھان سماچار
---------------
ہندوستان سماچار / انظر حسن
