جموں, 20 دسمبر (ہ س)۔ جموں و کشمیر لیفٹیننٹ گورنر منوج سنہا نے جموں و کشمیر میں جیلوں کی سیکورٹی کو مزید مؤثر بنانے کے لیے باقاعدہ جانچ پڑتال اور سخت نگرانی پر زور دیا ہے۔ انہوں نے یہ ہدایات ہفتہ کے روز لوک بھون میں محکمہ داخلہ کے تحت آنے والے مختلف ذیلی محکموں کی اعلیٰ سطحی جائزہ میٹنگ کے دوران دیں۔سرکاری ذرائع کے مطابق میٹنگ میں سال 2025-26 کے بجٹ تخمینوں کے تحت جیل خانہ جات، استغاثہ، ہوم گارڈز/سی ڈی و ایس ڈی آر ایف، فائر اینڈ ایمرجنسی سروسز، فارنسک سائنسز لیبارٹری، سائنک ویلفیئر ڈیپارٹمنٹ اور پبلک سیفٹی ایکٹ کے تحت ایڈوائزری بورڈ کی مالی اور اخراجاتی صورتحال کا تفصیلی جائزہ لیا گیا۔
لیفٹیننٹ گورنر نے جاری اہم منصوبوں میں حاصل شدہ پیش رفت پر اطمینان کا اظہار کرتے ہوئے کٹھوعہ کے مہان پور میں ہائی سیکورٹی جیل کی تعمیر، ایف ایس ایل جموں میں سائبر ڈویژن کے قیام، ایف ایس ایل سرینگر میں سائبر ڈویژن کی اپ گریڈیشن اور سرحدی اضلاع میں بنکروں کی تعمیر جیسے منصوبوں کو مقررہ مدت میں مکمل کرنے کی ہدایت دی۔
انہوں نے محکمہ داخلہ کے مختلف شعبہ جات کے درمیان بہتر تال میل کے ذریعے ادارہ جاتی صلاحیت میں اضافے پر زور دیا اور ساتھ ہی جیل افسران و عملے کی پیشہ ورانہ تربیت اور حساسیت بڑھانے کی ہدایت دی۔ لیفٹیننٹ گورنر نے واضح کیا کہ جموں و کشمیر بھر کی جیلوں میں باقاعدہ جانچ، مؤثر نگرانی اور سخت سکیورٹی انتظامات کو یقینی بنایا جائے تاکہ نظم و ضبط برقرار رہے اور کسی بھی قسم کی کوتاہی کی گنجائش نہ رہے۔
ہندوستھان سماچار
---------------
ہندوستان سماچار / محمد اصغر
