جموں خطے میں انسدادِ دہشت گردی کارروائیوں میں تیزی

جموں, 20 دسمبر (ہ س)سرحد پار سے ممکنہ دراندازی سے متعلق خفیہ اطلاع ملنے کے بعد سیکورٹی فورسز نے جموں خطے میں انسدادِ دہشت گردی کارروائیوں میں تیزی لا دی ہے۔ گھنے کہرے اور خراب موسمی حالات کے باوجود مختلف اضلاع میں بڑے پیمانے پر تلاشی مہم جاری ہے۔حکام کے مطابق کٹھوعہ، سانبہ، جموں اور راجوری اضلاع میں بین الاقوامی سرحد (آئی بی) کے قریب پولیس، بارڈر سیکورٹی فورس (بی ایس ایف)، سینٹرل ریزرو پولیس فورس (سی آر پی ایف) اور فوج کے جوان مشترکہ طور پر تلاشی کارروائیاں انجام دے رہے ہیں۔ اس کے علاوہ ضلع کشتواڑ کے چھاترو جنگلاتی علاقے میں بھی سیکورٹی فورسز کی جانب سے سخت نگرانی اور تلاشی جاری ہے۔

حکام نے بتایا کہ خفیہ ایجنسیوں کی رپورٹس کے مطابق گزشتہ دو دنوں کے دوران کٹھوعہ–سانبہ–جموں سیکٹر میں ہیرا نگر، گھگوال، رام گڑھ اور اکھنور کے سامنے سرحد پر واقع لانچ پیڈز پر مشتبہ دہشت گردوں کی سرگرمیاں دیکھی گئی ہیں۔ ممکنہ دراندازی کو ناکام بنانے کے لیے ضلع کٹھوعہ کے بوبیا سرحدی چوکی، ٹپن، مریڈ، پہاڑپور، پنسار، منیاری، ترنا نالہ، بین نالہ، کشن پور کنڈی، چک چھبے، ڈولکا سامیال اور رُخِ سرکار علاقوں میں محاصرہ اور تلاشی مہم چلائی جا رہی ہے۔

اسی طرح ضلع سانبہ کے بابر نالہ، پلوڑا، ترائل، مانسر اور چِلّا ڈانگا علاقوں کے علاوہ اکھنور سیکٹر کے پرگوال اور ملحقہ علاقوں میں بھی سیکورٹی فورسز کی تعیناتی بڑھا دی گئی ہے۔ راجوری ضلع میں بھی کسی بھی دراندازی کی کوشش کو ناکام بنانے کے لیے تلاشی کارروائیاں تیز کر دی گئی ہیں۔ حکام کے مطابق خراب موسم اور گھنے کہرے کے باوجود علاقے میں سیکورٹی کنٹرول برقرار رکھنے کے لیے یہ کارروائیاں مسلسل جاری ہیں۔ دریں اثنا، جمعہ کو چلائی گئی ایک تلاشی مہم کے دوران سیکورٹی فورسز نے چار دستی بم بھی برآمد کیے ہیں۔

ہندوستھان سماچار

---------------

ہندوستان سماچار / محمد اصغر