بیجاپور/رائے پور، 19 دسمبر (ہ س)۔ چھتیس گڑھ کے نکسل متاثرہ بیجاپور ضلع کے بھیرم گڑھ تھانے کے تحت اندراوتی علاقے کے گھنے جنگلات اور پہاڑی علاقوں میں آج جمعہ کی صبح پولیس اور نکسلیوں کے درمیان تصادم جاری ہے۔ انکاؤنٹر میں ایک نکسلائیٹ کے مارے جانے کی اطلاع ہے۔ سیکیورٹی فورسز نے جائے وقوعہ سے لاش اور اسلحہ برآمد کرلیا ہے۔ ایڈیشنل سپرنٹنڈنٹ آف پولیس چندرکانت گوورنا نے پولیس-نکسلی تصادم کی تصدیق کی۔

نکسلیوں کی موجودگی کی مصدقہ اطلاع کی بنیاد پر بیجاپور ضلع سے ڈسٹرکٹ ریزرو گارڈ (ڈی آر جی) کی ایک ٹیم نے تلاشی مہم شروع کی تھی۔

جمعہ کی صبح تلاشی مہم کے دوران، ڈی آر جی سپاہیوں اور ماؤنوازوں کا اچانک آمنا سامنا ہوا، جس کے نتیجے میں وقفے وقفے سے فائرنگ کا تبادلہ ہوا۔ جنگلات اور پہاڑی علاقے نے آپریشن کو مشکل بنا دیا ہے۔ ذرائع کا کہنا ہے کہ تصادم کی جگہ کے ارد گرد اضافی سیکورٹی فورسز کو الرٹ پر رکھا گیا ہے تاکہ کسی بھی صورت حال سے نمٹنے کے لیے تیار رہیں۔

بیجاپور کے ایڈیشنل سپرنٹنڈنٹ آف پولیس چندرکانت گوورنا نے کہا کہ انکاؤنٹر، بازیابیوں اور ممکنہ نتائج کے بارے میں تفصیلی معلومات آپریشن مکمل ہونے کے بعد ہی شیئر کی جائیں گی۔ پورے علاقے میں سکیورٹی سخت کر دی گئی ہے اور شہریوں کو جنگلاتی علاقے میں جانے سے گریز کرنے کی تاکید کی گئی ہے۔

---------------

ہندوستان سماچار / عبدالسلام صدیقی