حیدرآباد، 18 دسمبر (ہ س)۔ ریاستی وزیر کونڈا سریکھا نے قلعہ ورنگل کی تاریخی عیدگاہ میں ایک کروڑ روپے کی لاگت سے ہونے والے ترقیاتی کاموں کا باضابطہ افتتاح کیا۔ یہ تمام تعمیراتی کام گریٹر ورنگل میونسپل کارپوریشن کے تحت انجام دیے جائیں گے۔ وزیر موصوفہ نے متعلقہ حکام کو ہدایت دی کہ ترقیاتی کاموں کو مقررہ وقت میں اور معیاری انداز میں مکمل کیا جائے۔ اس موقع پر عیدگاہ کمیٹی کے صدر ایم اے جبار نے ریاستی وزیر کونڈا سریکھا کا خصوصی اور پرتپاک استقبال کیا۔ اپنے خطاب میں ایم اے جبار نے کہا کہ عیدگاہ کے بنیادی ڈھانچے کو بہتر بنانے کے لیے 2014 سے مسلسل کوششیں کی جا رہی تھیں اور اب 2025 میں جا کر یہ خواب شرمندۂ تعبیر ہوا ہے۔ انہوں نے کہا کہ گریٹر ورنگل میونسپل کارپوریشن کے تعاون سے ایک کروڑ روپے کے ترقیاتی کاموں کا آغاز عیدگاہ کے لیے ایک اہم سنگِ میل ہے۔

ایم اے جبار نے مزید کہا کہ ان ترقیاتی کاموں کی تکمیل کے بعد ہر سال عید کی نماز ادا کرنے والے ہزاروں افراد کو بہتر سہولتیں حاصل ہوں گی۔ انہوں نے عیدگاہ کمیٹی اور ریلوے گیٹ علاقے کے تمام مسلمانوں کی جانب سے وزیر محترمہ کونڈا سریکھا کا شکریہ ادا کرتے ہوئے کہا کہ انہی کی خصوصی دلچسپی اور کاوشوں سے یہ منصوبہ ممکن ہو سکا۔ تقریب میں میرگنڈو سودا رانی، مونسپل کمشنر چاہت واجپائی، بلدیہ کے مختلف عہدیداروں کے علاوہ عیدگاہ کمیٹی کے ذمہ داران اور معززین کی بڑی تعداد شریک رہی۔

واضح رہے کہ ان ترقیاتی کاموں کی تکمیل کے بعد قلعہ ورنگل عیدگاہ نہ صرف مزید خوبصورت بنے گی بلکہ نمازیوں کے لیے سہولتیں بھی بہتر ہوں گی، جس سے مقامی مسلم کمیونٹی کو براہِ راست فائدہ پہنچے گا۔ ریاستی حکومت کی جانب سے اقلیتی بہبود کے لیے کیے جانے والے یہ اقدامات قابلِ ستائش قرار دیے جا رہے ہیں۔

ہندوستھان سماچار

ہندوستان سماچار / محمدعبدالخالق