حیدرآباد، 18 دسمبر (ہ س)۔ مرکزی وزیرکوئلہ جی کشن ریڈی نے تلنگانہ کے اسپیکر پرساد کمار کے اس فیصلے کو شدید تنقید کا نشانہ بنایا ہے جس میں انہوں نے بی آر ایس چھوڑ کر کانگریس میں شامل ہونے والے ارکانِ اسمبلی کے خلاف نا اہلی کی درخواستوں کو مستردکردیا۔ میڈیا سے بات کرتے ہوئے کشن ریڈی نے کہاکہ یہ فیصلہ جمہوریت کے خلاف ہے اور یہ دیکھنا انتہائی افسوسناک ہے کہ 10 ارکانِ اسمبلی کے کانگریس میں شامل ہونے کے واضح ثبوتوں کے باوجود اسپیکر نے یہ کہا کہ انہوں نے پارٹی تبدیل نہیں کی ہے۔

انہوں نے الزام لگایا کہ کانگریس اور بی آر ایس دونوں ہی جماعتوں کو دستور اور قانون کا کوئی احترام نہیں ہے اور دونوں نے پارٹی تبدیلی قانون کی دھجیاں اڑائی ہیں۔ انہوں نے مزید کہا کہ اگر راہل گاندھی واقعی دستورِ ہند کا احترام کرتے ہیں تو انہیں ان منحرف ارکان کو نااہل قراردلوانا چاہیے تھا۔ واضح رہے کہ اسپیکر جی پرساد کمار نے گزشتہ روز ٹی وینکٹ راؤ، بی کرشنا موہن ریڈی، جی مہیپال ریڈی، پرکاش گوڑ اور اے گاندھی کے خلاف دائر درخواستوں کو یہ کہتے ہوئے مسترد کر دیا تھا کہ ان کے پارٹی تبدیل کرنے کے کافی ثبوت موجود نہیں ہیں اور تکنیکی طور پر وہ اب بھی بی آر ایس کا حصہ ہیں۔

ہندوستھان سماچار

ہندوستان سماچار / محمدعبدالخالق