نئی دہلی، 17 دسمبر (ہ س): ایف آئی ایچ ہاکی مردوں کے جونیئر ورلڈ کپ میں کانسہ کا تمغہ جیتنے کے بعد، ہندوستانی جونیئر ٹیم نے اب اپنی توجہ آئندہ ہیرو ہاکی انڈیا لیگ (ایچ آئی ایل) پر مرکوز کر دی ہے۔ ٹیم کے نوجوان ستارے، جنہوں نے ارجنٹائن کے خلاف 2-4 کی شاندار واپسی کے ساتھ ٹورنامنٹ کا اختتام کیا، وہ سینئر ٹیم میں جگہ بنانے کی امیدوں کے ساتھ لیگ میں خود کو ثابت کرنا چاہتے ہیں۔

ویمنز ہیرو ہاکی انڈیا لیگ 28 دسمبر سے رانچی میں شروع ہوگی جبکہ مردوں کی لیگ 3 جنوری سے چنئی میں کھیلی جائے گی۔

جونیئر کھلاڑی اچھی طرح جانتے ہیں کہ یہ لیگ ان کے کیریئر کے لیے بہت اہم ہے۔ ہندوستانی سینئر ٹیم کے ہیڈ کوچ کریگ فلٹن ان کی کارکردگی پر گہری نظر رکھے ہوئے ہیں۔ اس کے بارے میں بات کرتے ہوئے ٹورنامنٹ میں پانچ گول کرنے والے دلراج سنگھ نے کہا، جونیئر ورلڈ کپ میں تمغہ جیتنا ہمارے لیے بہت اچھا تجربہ تھا، لیکن اب ہاکی انڈیا لیگ میں اچھی کارکردگی کا مظاہرہ کرنا سینئر ٹیم میں جگہ حاصل کرنے کے لیے اگلا بڑا قدم ہے۔ یہاں ہم دنیا بھر کے سینئر کھلاڑیوں کے ساتھ ایک ہی پلیٹ فارم پر کھیلیں گے، اس لیے اچھی کارکردگی کا مظاہرہ کرنا ضروری ہے۔

دلراج سنگھ اس سیزن میں ایس جی پائپرز کے لیے کھیلتے نظر آئیں گے۔

کانسہ کے تمغے کے مقابلے میں شاندار گول کر کے پلیئر آف دی میچ کا اعزاز حاصل کرنے والے انمول ایکا بھی جنوری میں ہونے والی لیگ کو اپنے لیے بڑا موقع سمجھتے ہیں۔

انہوں نے کہا، میں اس سیزن میں رانچی رائلز کے لیے کھیلنے کے لیے بہت پرجوش ہوں۔ مجھے لوئک لوئیپارٹ اور ٹام بون جیسے بہترین پی سی ماہرین کے ساتھ کھیلنے اور ان سے سیکھنے کا موقع ملے گا۔ مجھے یقین ہے کہ یہ تجربہ سینئر کور گروپ میں جگہ حاصل کرنے کے لیے میری پوزیشن کو مضبوط بنائے گا۔

ہندوستانی فارورڈ لائن کے اہم کھلاڑی اور راؤنڈ رابن مرحلے میں ہیٹ ٹرک کرنے والے ارشدیپ سنگھ اس بار حیدرآباد ہریکینز کی جرسی میں نظر آئیں گے۔

انہوں نے کہا، میں ہاکی انڈیا لیگ کو لے کر بہت پرجوش ہوں۔ اس لیگ نے پہلے ہی بہت سے کھلاڑیوں کو سینئر ٹیم تک پہنچنے میں مدد فراہم کی ہے۔ امیت روہیداس اس کی ایک اہم مثال ہیں، جنہوں نے 2017 میں کلنگا لانسر کے ساتھ کھیلنے کے بعد نئی کامیابیاں حاصل کیں۔ ہم جانتے ہیں کہ آنے والا سال ہمارے لیے اہم ہے۔ اگر ہم ابھی اچھی کارکردگی کا مظاہرہ نہیں کرتے ہیں تو سینئر ٹیم کا راستہ اور بھی طویل ہو جائے گا۔

ارشدیپ نے مزید کہا کہ ہیڈ کوچ کریگ فلٹن پہلے ہی کیمپ کے دوران پریکٹس میچوں میں جونیئر اور سینئر ٹیموں کی کارکردگی دیکھ چکے ہیں اور اب وہ ایچ آئی ایل میں بھی کھلاڑیوں پر نظر رکھیں گے۔

اس سیزن میں تمام جونیئر کھلاڑی لیگ کی چھ فرنچائز ٹیموں کا حصہ ہیں، جو ٹائٹل کے لیے مدمقابل ہوں گی۔ ٹورنامنٹ کا افتتاحی میچ تمل ناڈو ڈریگنز اور حیدرآباد ہریکینز کے درمیان چنئی کے میئر رادھا کرشنن ہاکی اسٹیڈیم میں کھیلا جائے گا۔

---------------

ہندوستان سماچار / عبدالسلام صدیقی