اندور میں این آر آئی مہا پرو کا شاندار آغاز، 27 ملکوں کے مہمانوں نے میئر کے ساتھ گلی ڈنڈا کھیلا

۔ 27 ملکوں سے 220 سے زیادہ تارکین وطن پہنچے اندور، ناشتے کا اٹھایا لطف، شام کو بزنس سمٹ ہوگی

اندور، 17 دسمبر (ہ س)۔ منی ممبئی کے نام سے مشہور مدھیہ پردیش کی اقتصادی راجدھانی اندور میں این آر آئی فورم کے ذریعے منعقدہ این آر آئی مہا پرو کے چوتھے ایڈیشن کی بدھ کو شروعات ہو گئی ہے۔ اس خاص انعقاد میں شامل ہونے کے لیے دنیا کے 27 ملکوں سے 220 سے زیادہ تارکین وطن ہندوستانی (این آر آئی) اندور پہنچے ہیں۔ غیر ملکی مہمانوں نے یہاں صبح ناشتے کا لطف اٹھایا اور میئر پشیہ متر بھارگو کے ساتھ گلی ڈنڈا بھی کھیلا۔

اندور میئر پشیہ متر بھارگو کی صدارت میں ہو رہے اس پروگرام کی شروعات صبح یشونت کلب میں ہوئی، جہاں صبح 8 بجے سے ہی جشن کا ماحول تھا۔ یہاں این آر آئی مہمانوں کے لیے روایتی ہندوستانی کھیلوں کا انعقاد کیا گیا۔ گلی ڈنڈا، کبڈی، پتنگ اڑانا، لٹو اور لنگڑی جیسے دیسی کھیلوں میں این آر آئی پورے جوش کے ساتھ شامل ہوئے۔ میئر پشیہ متر بھارگو بھی ان کھیلوں میں شامل ہوئے اور تارکین وطن کے ساتھ خوب مستی کی۔ ان کھیلوں نے سبھی کو بچپن کی یادوں میں لوٹا دیا۔

کھیلوں کے ساتھ ساتھ این آر آئی مہمانوں نے اندور کے مشہور ناشتے کا بھی ذائقہ لیا۔ مہمانوں نے پوہا جلیبی اور دیگر دیسی ناشتے کا لطف اٹھایا۔ اس پورے انعقاد میں ہندوستانی ثقافت اور روایات کی جھلک صاف نظر آئی۔ ہانگ کانگ، سویڈن، جاپان، یو کے، آسٹریلیا، دبئی، امریکہ، اسپین، شارجہ اور جرمنی سمیت کئی ملکوں سے آئے اندوری تارکین وطن اس پروگرام کا حصہ بنے۔

اس موقع پر میئر پشیہ متر بھارگو نے انعقاد کی اہمیت کو سمجھاتے ہوئے کہا کہ اس کا مقصد دنیا بھر میں بسے این آر آئی کو اندور میں ہو رہے ترقیاتی کاموں سے آگاہ کرانا ہے۔ انتظامیہ کی کوشش ہے کہ تارکین وطن ہندوستانی ان کاموں میں اپنی شراکت داری بڑھائیں۔ ساتھ ہی، یہ اسٹیج اس بات کو بھی اجاگر کرتا ہے کہ اندوری دنیا بھر میں کس طرح نام کما رہے ہیں اور وہ اپنے شہر کے لوگوں کی مدد کس طرح کر سکتے ہیں۔

این آر آئی مہا پرو کے تحت بدھ کو شام کو ڈیلی کالج احاطے میں بزنس سمٹ کا انعقاد کیا جائے گا۔ اس میں اندور کی ترقی، مستقبل اور سرمایہ کاری کے امکانات پر بحث ہوگی۔ سمٹ کے بعد ثقافتی پروگرام ہوں گے، جہاں ہندوستانی فن اور ثقافت کی پیشکش دی جائے گی۔ پروگرام کے اختتام پر سبھی غیر ملکی مہمانوں کا روایتی مالوی کھانے سے استقبال کیا جائے گا، تاکہ وہ اندور کی ثقافتی وراثت اور ذائقے کو قریب سے محسوس کر سکیں۔

میئر بھارگو نے سوشل میڈیا ایکس پر جانکاری شیئر کرتے ہوئے کہا کہ اندور شہر کی صلاحیتوں نے پوری دنیا میں اپنے کاموں کے ذریعے ہمارے اندور شہر کا سر فخر سے بلند کیا ہے۔ غیر ملکوں میں رہائش پذیر ہمارے اندوری بھائیوں کو ایک پلیٹ فارم دستیاب کرانے کے لیے ہر سال اندوری این آر آئی سمٹ کا انعقاد کیا جاتا ہے۔ اسی سلسلے میں آج اندوری این آر آئی سمٹ کے چوتھے ایڈیشن میں حصہ لے کر پوری دنیا سے آئے اندوری بھائیوں کے ساتھ مختلف تفریحی سرگرمیوں میں شرکت کی۔

ہندوستھان سماچار

---------------

ہندوستان سماچار / انظر حسن