ممبئی

، 17 دسمبر(ہ س)۔ مہاراشٹر

میں گڑھ قلعوں کی طرز پر اب ریاستی سطح پر محفوظ تاریخی یادگاروں کے اطراف بھی

تجاوزات کے خلاف سخت اقدامات کیے جائیں گے۔ وزیر اعلیٰ دیویندر فڑنویس کی صدارت میں

منعقدہ کابینہ میٹنگ میں ثقافتی امور کے وزیر کی سربراہی میں ایک خصوصی کمیٹی قائم

کرنے کے فیصلے کو منظوری دی گئی۔

اس فیصلے

کے مطابق، ثقافتی امور کے محکمے کے 20 جنوری 2025 کے حکومتی فیصلے میں شامل گڑھ

قلعوں پر تجاوزات ہٹانے کی پالیسی کا دائرہ بڑھا دیا گیا ہے۔ اب اس میں ریاستی

محفوظ یادگاروں کو بھی شامل کیا گیا ہے تاکہ ان تاریخی مقامات کے تحفظ کو یقینی

بنایا جا سکے۔

کابینہ

نے فیصلہ کیا کہ ریاست بھر کے تمام گڑھ قلعوں اور ریاستی محفوظ یادگاروں پر موجود

تجاوزات کو ہٹانے اور آئندہ کسی بھی غیر قانونی قبضے کو روکنے کے لیے ایک ریاستی

سطح کی کمیٹی تشکیل دی جائے گی۔ اس کمیٹی کی قیادت ثقافتی امور کے وزیر کریں گے،

جبکہ اس میں مختلف اہم محکموں کے وزرا اور اعلیٰ افسران شامل ہوں گے۔

ریاستی

کمیٹی کے ساتھ ساتھ ہر ضلع میں بھی ایک ضلعی سطح کی کمیٹی قائم کی جائے گی، جس میں

چار غیر سرکاری اراکین کو شامل کرنے کی منظوری دی گئی ہے۔ یہ اراکین تاریخی گڑھ

قلعوں اور محفوظ یادگاروں کے مطالعہ سے وابستہ ماہرین، تحفظ و مرمت کے شعبے میں

کام کرنے والے افراد یا غیر سرکاری تنظیموں سے تعلق رکھتے ہوں گے۔

ضلعی

سطح پر تجاوزات ہٹانے اور روکنے کی ذمہ داری ضلع کلکٹروں پر عائد ہوگی، جو زمین کے

متعلقہ مالک محکمے کے ساتھ تال میل میں کارروائی انجام دیں گے۔ اس مقصد کے لیے

درکار مالی وسائل ضلع منصوبہ بندی اور ترقیاتی فنڈ سے فراہم کیے جائیں گے۔

ہندوستھان

سماچار

ہندوستان سماچار / جاوید این اے