جموں، 17 دسمبر (ہ س)۔

ضلع ڈوڈہ میں محکمہ زراعت کی جانب سے آتما اسکیم کے تحت کمیونٹی ہال ڈوڈہ میں کسان میلہ اور بلاک دیوس کا انعقاد کیا گیا۔ اس پروگرام کا افتتاح ڈائریکٹر زراعت جموں، انل گپتا نے کیا۔

اس موقع پر ڈپٹی کمشنر ڈوڈہ، ہرویندر سنگھ اور ڈی ڈی سی چیئرمین سمیت دیگر افسران اور متعلقہ محکموں کے نمائندگان بھی موجود تھے۔ افتتاحی تقریب کے بعد محکمہ زراعت اور دیگر الحاقی محکموں کی جانب سے مختلف اسٹالز قائم کیے گئے، جہاں کسانوں کی جانب سے لائی گئی زرعی پیداوار کی نمائش کی گئی۔

حکام نے اسٹالز کا معائنہ کیا اور کسانوں کے ساتھ تفصیلی بات چیت کرتے ہوئے ان کے مسائل اور تجاویز کو غور سے سنا۔ ڈپٹی کمشنر ڈوڈہ اور ڈائریکٹر زراعت نے کسانوں پر زور دیا کہ وہ حکومت کی مختلف زرعی اسکیموں سے بھرپور استفادہ کریں۔

انہوں نے کسانوں کو کیمیائی کھادوں کے کم سے کم استعمال اور نامیاتی (آرگینک) کاشتکاری کو فروغ دینے کی تلقین کی، تاکہ نہ صرف کسانوں کی آمدنی میں اضافہ ہو بلکہ صحت مند اور معیاری سبزیوں و اجناس کی پیداوار بھی ممکن بنائی جا سکے۔

ہندوستھان سماچار

ہندوستان سماچار / محمد اصغر