جموں, 14 دسمبر (ہ س)ڈائریکٹوریٹ آف اسکول ایجوکیشن جموں نے جموں ڈویژن کے سمر زون علاقوں میں واقع تمام سرکاری اور تسلیم شدہ نجی اسکولوں کے لیے سرمائی تعطیلات کا اعلان کر دیا ہے۔ محکمہ کی طرف سے جاری حکم نامے کے مطابق پری پرائمری سے پانچویں جماعت تک کے طلبہ کے لیے سرمائی تعطیلات 22 دسمبر سے 10 جنوری تک رہیں گی۔ چھٹی سے آٹھویں جماعت کے طلبہ کے لیے تعطیلات کا دورانیہ 26 دسمبر سے 10 جنوری تک مقرر کیا گیا ہے، جبکہ نویں سے بارہویں جماعت کے طلبہ کے لیے سرمائی تعطیلات 29 دسمبر سے 10 جنوری تک ہوں گی۔

حکم میں مزید کہا گیا ہے کہ تعطیلات کے دوران تدریسی عملہ ضرورت پڑنے پر کسی بھی تعلیمی سرگرمی کے لیے دستیاب رہے گا۔ اس کے ساتھ ہی تمام تدریسی عملے کو ہدایت دی گئی ہے کہ وہ 10 جنوری 2026 کو اپنی متعلقہ درسگاہوں میں دوبارہ حاضری یقینی بنائیں۔ڈائریکٹوریٹ نے واضح کیا ہے کہ مقررہ شیڈول کی خلاف ورزی یا احکامات پر عمل نہ کرنے کی صورت میں اداروں کے سربراہان اور تدریسی عملے کے خلاف متعلقہ قوانین کے تحت سخت کارروائی عمل میں لائی جائے گی۔یہ حکم مجاز اتھارٹی کی منظوری کے بعد جاری کیا گیا ہے اور اس پر سختی سے عمل درآمد کو یقینی بنانے کے لیے تمام متعلقہ محکموں اور افسران کو ارسال کر دیا گیا ہے۔

ہندوستھان سماچار

---------------

ہندوستان سماچار / محمد اصغر