نئی دہلی، 13 دسمبر (ہ س)۔ کانگریس پارٹی کی اعلیٰ قیادت نے کیرالہ میں بلدیاتی انتخابات میں پارٹی کی قیادت والی یونائیٹڈ ڈیموکریٹک فرنٹ (یو ڈی ایف) کی کامیابی پر خوشی کا اظہار کیا ہے۔ پارٹی صدر ملکارجن کھڑگے اور مرکز میں اپوزیشن لیڈر راہل گاندھی نے نتائج کو آئندہ 2026 کے اسمبلی انتخابات میں اتحاد کی فیصلہ کن جیت کا واضح اشارہ قرار دیا۔
کانگریس صدر ملکارجن کھڑگے نے کیرالہ کے لوگوں کا شکریہ ادا کیا اور ایک ایکس پوسٹ میں دعویٰ کیا کہ یونائیٹڈ ڈیموکریٹک فرنٹ (یو ڈی ایف) آئندہ اسمبلی انتخابات میں بھی ایسا ہی مینڈیٹ حاصل کرے گی۔ انہوں نے یقین ظاہر کیا کہ ریاستی کانگریس کارکن ذمہ داری اور متحد ہو کر مہم جاری رکھیں گے۔
لوک سبھا میں قائد حزب اختلاف راہل گاندھی نے پارٹی قائدین اور کارکنوں سے اظہار تشکر کیا۔ انہوں نے کہا کہ ان کی لگن اور محنت نے فتح کو ممکن بنایا۔ مینڈیٹ کو فیصلہ کن اور حوصلہ افزا قرار دیتے ہوئے راہل گاندھی نے کہا کہ یہ واضح طور پر آنے والے اسمبلی انتخابات میں پارٹی کی قیادت والے اتحاد کی زبردست جیت کا اشارہ دے رہا ہے۔
انہوں نے کہا کہ کیرالہ کے لوگ جوابدہ حکومت چاہتے ہیں۔ انہوں نے کہا، اب ہمیں کیرالہ کے عام لوگوں کے ساتھ کھڑا ہونا ہے اور ان کے روزمرہ کے خدشات کو دور کرنا ہے اور شفاف اور عوام دوست طرز حکمرانی کو یقینی بنانا ہے۔
دریں اثنا، پارٹی کے جنرل سکریٹری اور لوک سبھا ایم پی کے سی وینوگوپال، جن کا تعلق کیرالہ سے ہے، نے کہا کہ بلدیاتی انتخابات کے نتائج 2026 کے اسمبلی انتخابات میں یو ڈی ایف کی بڑی جیت کا پیش خیمہ ہیں۔ عوام نے ایل ڈی ایف کو بے نقاب کر دیا ہے۔
انہوں نے کہا کہ آئندہ انتخابات میں کیرالہ بھارتیہ جنتا پارٹی کی تقسیم اور پولرائزنگ سیاست کو سختی سے مسترد کرنے کی اپنی روایت کو جاری رکھے گا، جیسا کہ اس نے ہمیشہ کیا ہے۔
---------------
ہندوستان سماچار / عبدالسلام صدیقی
