جموں میں منشیات فروشوں اور زمین پر ناجائز قبضہ کرنے والوں کے خلاف بڑی کارروائی

جموں، 13 دسمبر (ہ س)۔ جموں میں منشیات فروشوں اور زمین پر ناجائز قبضہ کرنے والوں کے خلاف بڑی کارروائی کے دوران آٹھ غیر قانونی ڈھانچوں کو منہدم کر دیا گیا، جن میں مبینہ منشیات فروشوں کے مکانات بھی شامل ہیں، جبکہ ضلع کٹھوعہ میں ایک شخص کو 6.64 گرام ہیروئن سمیت گرفتار کیا گیا ہے۔ حکام کے مطابق ضلع مجسٹریٹ جموں راکیش منہاس کی ہدایت پر ضلع انتظامیہ جموں نے سینئر سپرنٹنڈنٹ آف پولیس جموں جوگیندر سنگھ کے اشتراک سے تحصیل باہو کے گاؤں نروال بالا میں انہدامی مہم چلائی۔ اس دوران منشیات فروشوں کے آٹھ غیر قانونی ڈھانچوں کو مسمار کیا گیا، جو این ڈی پی ایس ایکٹ کے تحت متعدد مقدمات میں ملوث بتائے جا رہے ہیں۔

حکام نے بتایا کہ متعلقہ افراد کو کافی مہلت دی گئی تھی، تاہم اس کے باوجود انہوں نے اپنی سرگرمیاں ترک نہیں کیں اور منشیات کی غیر قانونی خرید و فروخت میں بدستور ملوث رہے۔ ضلع انتظامیہ نے واضح کیا کہ غیر قانونی تعمیرات یا ناجائز قبضے کو کسی بھی صورت برداشت نہیں کیا جائے گا اور این ڈی پی ایس سے متعلق جرائم سمیت دیگر خلاف ورزیوں میں ملوث افراد کے خلاف سخت قانونی کارروائی جاری رہے گی۔

ایک علیحدہ واقعے میں حکام نے بتایا کہ ضلع کٹھوعہ کے نگری علاقے میں گاڑیوں کی جانچ کے دوران ایک منشیات فروش کو گرفتار کیا گیا، جس کے قبضے سے 6.64 گرام ہیروئن برآمد ہوئی۔ ملزم کی شناخت پرویندر سنگھ سکنہ کٹھوعہ کے طور پر کی گئی ہے، جو موٹر سائیکل پر سوار تھا، جسے ضبط کر لیا گیا ہے۔ ملزم کے خلاف این ڈی پی ایس ایکٹ کے تحت مقدمہ درج کر کے مزید تفتیش جاری ہے۔

ہندوستھان سماچار

--------------

ہندوستان سماچار / محمد اصغر