انتظامیہ نے بالائی علاقوں سے گزرنے والی شاہراہوں کے لیے ایڈوائزری جاری کی

جموں, 13 دسمبر (ہ س)۔ ضلع ڈوڈہ میں موسم کی اچانک تبدیلی اور درجہ حرارت میں نمایاں کمی کے پیش نظر انتظامیہ نے بالائی علاقوں سے گزرنے والی اہم شاہراہوں کے لیے ایڈوائزری جاری کر دی ہے، تاکہ پھسلن کے باعث ممکنہ ٹریفک حادثات سے بچا جا سکے۔ ڈپٹی کمشنر ڈوڈہ ہرویندر سنگھ نے بتایا کہ چھترگلہ، بھدرواہ–چمبا اور ٹھنٹھیرا تھنالہ سڑک کو خراب موسمی حالات اور درجہ حرارت میں کمی کے باعث عارضی طور پر گاڑیوں کی آمدورفت کے لیے بند کر دیا گیا ہے۔ تاہم مذکورہ سڑکوں پر صرف ایڈوائزری کے مطابق اور مقررہ اوقات میں ہی گاڑیوں کو چلنے کی اجازت دی جائے گی۔

اُنہوں نے کہا کہ صبح دس بجے سے شام پانچ بجے تک گاڑیوں کی آمدورفت ممکن ہوگی۔ ڈی سی نے مزید بتایا کہ سردی میں مزید اضافہ ہو گیا ہے اور حالیہ برفباری کے باعث سڑکوں پر پھسلن پیدا ہونے کا شدید خدشہ ہے، کیونکہ درجہ حرارت منفی سطح تک پہنچ چکا ہے۔ اُنہوں نے عوام سے اپیل کی کہ جن سڑکوں پر نکاسیٔ آب جمع ہو رہی ہو یا پانی جم رہا ہو، اس کی فوری اطلاع انتظامیہ کو دیں، تاکہ بروقت کارروائی عمل میں لائی جا سکے۔انتظامیہ نے انسانی جان و مال کے تحفظ کو یقینی بنانے کے لیے یہ احتیاطی قدم اُٹھایا ہے اور عوام سے گزارش کی ہے کہ وہ جاری کردہ ایڈوائزری پر سختی سے عمل کریں۔

ہندوستھان سماچار

---------------

ہندوستان سماچار / محمد اصغر