ممبئی ، 10 دسمبر (ہ س)۔ ریاستی نائب وزیر اعلیٰ اجیت پوار نے بدھ کو اسمبلی میں اعلان کیا کہ مہاراشٹر میں اب شراب فروخت کرنے والی تمام دکانوں—خواہ وہ دیسی شراب بیچتی ہوں یا فارن —کو موجودہ تجارتی مقامات پر کاروبار شروع کرنے سے پہلے متعلقہ ہاؤسنگ سوسائٹی سے باقاعدہ عدم اعتراض کا سرٹیفکیٹ حاصل کرنا لازمی ہوگا۔ انہوں نے زور دیا کہ پالیسی کا نفاذ پورے مہاراشٹر میں ایک جیسے ضابطوں کے ساتھ کیا جائے گا۔یہ معاملہ اس وقت ایوان میں زیر بحث آیا جب چنچواڑ اسمبلی حلقے کے ایم ایل اے شنکر جگتاپ نے شکایت کی کہ چنچواڑ–کالے واڑی کے کئی رہائشی علاقوں میں شراب کی دکانیں سوسائٹی کی اجازت کے بغیر چل رہی ہیں، جو رہائشیوں کے لیے پریشانی کا سبب بن رہی ہیں۔ انہوں نے متعلقہ دکانوں کے لائسنس منسوخ کرنے اور ذمہ داروں کے خلاف کارروائی کا مطالبہ کیا۔اجیت پوار نے واضح کیا کہ این او سی کے بغیر کوئی شراب کی دکان چلانے کی اجازت نہیں دی جائے گی اور اصول کی خلاف ورزی کرنے والوں کے خلاف سخت کارروائی کی جائے گی۔ انہوں نے کہا کہ رہائشی علاقوں میں امن برقرار رکھنے کے لیے یہ ضابطہ ناگزیر ہے اور حکومت اسے پوری مستعدی کے ساتھ نافذ کرے گی۔
ہندوستھان سماچار
--------------------
ہندوستان سماچار / جاوید این اے
11 Dec 2025
