حیدرآباد، 10 دسمبر (ہ س) ۔تلنگانہ کے وزیر اعلیٰ ریونت ریڈی نے آج اپنے سرکاری پروگرام کے تحت عثمانیہ یونیورسٹی کا دورہ کیا۔ مجموعی طور پر ماحول پُرسکون رہا، تاہم چند شرارتی طلبہ نے نعرے لگانے کی کوشش کرکے معمولی خلل پیدا کیا۔یہ صورتحال زیادہ دیر برقرار نہیں رہی کیونکہ یونیورسٹی کیمپس میں تعینات پولیس نے فوری کارروائی کرتے ہوئے معاملے کو مکمل طور پر قابو میں کرلیا۔ پولیس کی بروقت مداخلت کے باعث کوئی بڑا مسئلہ پیدا ہونے نہیں پایا۔ کیپمس ذرائع کے مطابق جیسے ہی چند طلبہ نے وزیراعلیٰ کے قافلے کے قریب شور شرابا کرنے کی کوشش کی، پولیس نے فوراً حرکت میں آتے ہوئے انہیں راستے سے الگ کردیا۔ جگہ جگہ بیریکیڈس لگائے گئے تھے جس کے باعث صورتحال چند منٹ میں دوبارہ معمول پر آگئی۔ سخت سیکیورٹی انتظامات کی وجہ سے وزیراعلیٰ کا دورہ باآسانی اور بلا رکاوٹ جاری رہا۔ یونیورسٹی سے موصولہ اطلاعات کے مطابق عثمانیہ یونیورسٹی کے بیشتر طلبہ اور عملے نے وزیراعلیٰ کے دورے کا خیرمقدم کیااور پورے پروگرام کے دوران ماحول پُرسکون اور منظم رہا۔ سرکاری حکام نے بھی یونیورسٹی انتظامیہ کے تعاون کو قابلِ ستائش قرار دیا۔
ہندوستھان سماچار
ہندوستان سماچار / محمدعبدالخالق
