ایڈیلیڈ، 10 دسمبر (ہ س)۔ آسٹریلیا کے کپتان پیٹ کمنز کی تیسرے ایشیز ٹیسٹ کے لیے آسٹریلیائی ٹیم میں واپسی ہوئی ہے۔ یہ ٹیسٹ 17 دسمبر سے ایڈیلیڈ اوول میں کھیلا جائے گا۔ کرکٹ آسٹریلیا نے تیسرے ٹیسٹ کے لیے 15 رکنی ٹیم کا اعلان کیا ہے، جس میں کمنز کی واپسی ہی واحد نئی تبدیلی ہے۔

پیٹ کمنز نے پیٹھ کے نچلے حصے (لمبر بیک اسٹریس) میں چوٹ کی وجہ سے ایشیز سیریز کے ابتدائی 2 ٹیسٹ نہیں کھیلے تھے۔ انہوں نے آخری بار جولائی میں ویسٹ انڈیز کے خلاف سبینا پارک میں کھیلے گئے تیسرے ٹیسٹ میں مسابقتی کرکٹ کھیلا تھا۔

کمنز گزشتہ ہفتے گابا ٹیسٹ کے لیے انتخاب کے کافی قریب تھے، کیونکہ ان کی ریکوری امید سے تیز رہی تھی۔ حالانکہ، ٹیم مینجمنٹ نے انہیں پوری طرح تیار کرنے کے لیے میچ سیمولیشن کے تحت کئی اسپیلز گیند بازی کروانے کا فیصلہ لیا۔

ہیڈ کوچ اینڈریو میکڈونالڈ نے کہا، ”وہ ہماری امید سے کافی آگے تھے اور برسبین ٹیسٹ کے لیے ان کے انتخاب پر سنجیدہ بحث ہوئی تھی۔ اب ہم مانتے ہیں کہ ایڈیلیڈ کے چیلنج کے لیے وہ پوری طرح تیار ہوں گے۔ نیٹس میں کیے گئے سیمولیشن سے ان کی اسکلز بھی تیار ہیں اور ان کا جسم کھیلنے کے لیے فٹ ہے۔ اگر اگلے ایک ہفتے میں کچھ غیر متوقع نہیں ہوتا، تو مجھے امید ہے کہ پیٹ کپتان کے طور پر ٹاس کرتے اور بلیزر پہنتے نظر آئیں گے۔“

اس بیچ، بلے باز عثمان خواجہ نے بھی ٹیم میں اپنی جگہ برقرار رکھی ہے۔ وہ پرتھ ٹیسٹ میں اثر چھوڑنے میں ناکام رہے تھے اور پیٹھ میں چوٹ کی وجہ سے گابا ٹیسٹ نہیں کھیل پائے تھے۔ میکڈونالڈ نے بتایا کہ خواجہ نے برسبین میں نیٹس میں اچھی بلے بازی کی اور ان کے اگلے ہفتے تک پوری طرح فٹ ہونے کی امید ہے۔

انہوں نے کہا، ”ازی (خواجہ) فٹ اور دستیاب ہونے چاہئیں۔ عام طور پر وہ سلامی بلے باز کے طور پر ہی کھیلتے ہیں، لیکن ان میں ترتیب میں تبدیلی کی صلاحیت بھی ہے۔ ہم مانتے ہیں کہ ہمارے سبھی بلے باز کسی بھی مقام پر کھیلنے کی قابلیت رکھتے ہیں۔“

ناتھن لیون کی بھی ایڈیلیڈ ٹیسٹ میں واپسی کا امکان ہے، جس سے انتخاب کو لے کر ٹیم مینجمنٹ کے سامنے مشکلیں کھڑی ہو سکتی ہیں۔ ایسے میں اسکاٹ بولینڈ، مائیکل نیسر اور برینڈن ڈوگیٹ میں سے 2 کھلاڑیوں کو حتمی الیون سے باہر بیٹھنا پڑ سکتا ہے۔ وہیں خواجہ کی دستیابی سے بلے بازی کی ترتیب کو لے کر بھی کچھ فیصلے لینے ہوں گے۔

میکڈونالڈ نے آگے کہا، ”پرتھ اور برسبین ٹیسٹ کے درمیان اور پھر برسبین سے ایڈیلیڈ کے درمیان کا وقفہ ایسا تھا جسے ہم سنبھال سکتے تھے۔ اس لیے ایڈیلیڈ کے لیے سب سے متوازن اور دستیاب گیند بازی اٹیک کے ساتھ اترنے کا منصوبہ ہے۔ کسی کھلاڑی کو آرام دینے کا خیال فی الحال نہیں ہے، یہ فیصلہ شاید چوتھے اور پانچویں ٹیسٹ (میلبورن اور سڈنی) کے لیے لیا جا سکتا ہے۔“

دو ٹیسٹ جیت کر آسٹریلیا ایشیز سیریز میں 0-2 سے آگے ہے۔ 3 ٹیسٹ ابھی باقی ہیں اور ٹیم اگلے ہفتے ایڈیلیڈ اوول میں ایشیز برقرار رکھنے کے ارادے سے میدان میں اترے گی۔

تیسرے ٹیسٹ کے لیے آسٹریلیا کی ٹیم:

پیٹ کمنز (کپتان)، اسکاٹ بولینڈ، ایلکس کیری، برینڈن ڈوگیٹ، کیمرون گرین، ٹریوس ہیڈ، جوش انگلس، عثمان خواجہ، مارنس لابوشین، ناتھن لیون، مائیکل نیسر، اسٹیو اسمتھ، مچل اسٹارک، جیک ویدرلڈ، بیو ویبسٹر۔

ہندوستھان سماچار

---------------

ہندوستان سماچار / انظر حسن