حیدرآباد، 10 دسمبر (ہ س) ۔صنعت نگر میں جاگروتی جنم باٹا پروگرام کے سلسلے میں تلنگانہ جاگرتی کی صدر کَلوکُنٹلا کویتانے درگاہ حضرت سیدابراہیم شاہؒ کادورہ کیا اور چادر چڑھائی۔انہوں نے میڈیا سے گفتگو کرتے ہوئے کئی اہم نکات پر روشنی ڈالی۔کویتا نے بتایا کہ ان کاحیدرآباد کا پانچ روزہ دورہ جنم باٹا پروگرام کے تحت جاری ہے اور اسی پروگرام کے سلسلے میں آج وہ اس درگاہ پرحاضری کے لیے پہنچی ہیں۔انہوں نے کہاکہ درگاہوں کے اخراجات مکمل طور پرعوامی ڈونیشن پرچلتے ہیں، چاہے وہ صنعت نگرکی درگاہ ہو یا شہر کی کوئی اور درگاہ۔ان کے مطابق ایسے اداروں کی دیکھ بھال کی بنیادی ذمہ داری وقف بورڈ کی ہے۔تاہم کویتانے افسوس کا اظہار کرتے ہوئے کہا کہ وقف بورڈ کی جانب سے اکثر لاپرواہی دیکھنے میں آتی ہے۔ انہوں نے کہا کہ یہ صرف موجودہ حکومت میں نہیں، ہر دورِ حکومت میں دیکھا گیا ہے کہ وقف بورڈ درگاہوں کی دیکھ بھال میں کوتاہی برتتا ہے۔ چھت کی مرمت، بنیادی ضروری کام، اور دیگر چھوٹے بڑے امور فنڈز کی کمی کے باعث پینڈنگ پڑے رہتے ہیں۔کویتا نے درگاہ میں زیرِ تعلیم معصوم بچوں کاخصوصی ذکر کرتے ہوئے کہا کہ یہاں سے کئی بچے حفظِ قرآن مکمل کرکے حافظ بنتے ہیں اور معاشرے کے بہترین افراد کے طور پر اُبھرتے ہیں۔ انہوں نے زور دیا کہ ان بچوں کے مستقبل اور تعلیم کے لیے مناسب توجہ اور سہولیات کی فراہمی ضروری ہے۔انہوں نے حکومت سے اپیل کرتے ہوئے کہا کہ تمام درگاہوں اور مذہبی مقامات کو مفت بجلی فراہم کی جائےتاکہ ڈونیشن کے سہارے چلنے والے ان مقدس اداروں کو مالی آسانی حاصل ہو سکے۔ کویتا کے اس بیان نے وقف بورڈ کی کارکردگی اور مذہبی اداروں کی حالتِ زار پر ایک بار پھر بحث چھیڑ دی ہے۔ ان کاکہنا ہے کہ اگر حکومت اور متعلقہ ادارے سنجیدگی سے توجہ دیں تو مذہبی مقامات نہ صرف بہتر انداز میں چل سکتے ہیں بلکہ سماج کی خدمت بھی مؤثر طریقے سے انجام دے سکتے ہیں۔

ہندوستھان سماچار

ہندوستان سماچار / محمدعبدالخالق