نئی دہلی، 10 دسمبر (ہ س):۔

کھیلوں میں دوطرفہ تعاون کو مضبوط بنانے کے لئے انڈین اولمپک ایسوسی ایشن (آئی او اے) اور اطالوی نیشنل اولمپک کمیٹی (کانوئی) کے درمیان نئی دہلی میں ایک تاریخی مفاہمت کی یادداشت (ایم او یو) پر دستخط ہوئے۔ معاہدے کے تحت دونوں ممالک کے کھلاڑیوں، کوچز اور کھیلوں کے سائنس کے ماہرین کو ایک دوسرے کے اعلیٰ سطح کے کھیلوں کے بنیادی ڈھانچے اور اعلیٰ کارکردگی کے مراکز تک رسائی حاصل ہو گی۔

اس مفاہمت نامے پر دستخط کی تقریب میں اٹلی کے نائب وزیر اعظم اور خارجہ امور اور بین الاقوامی تعاون کے وزیر انتونیو تاجانی اور حکومت ہند کے نوجوانوں کے امور اور کھیل کے وزیر ڈاکٹر منسکھ مانڈ ویہ نے شرکت کی۔ یہ تقریب کھیلوں کے ذریعے اسٹریٹجک شراکت داری کو مزید گہرا کرنے کے لیے دونوں حکومتوں کے عزم کی عکاسی کرتی ہے۔

اس موقع پر انڈین اولمپک ایسوسی ایشن کی صدر ڈاکٹر پی.ٹی اوشا نے کہا کہ یہ دن ہندوستانی اولمپک تحریک کے لیے قابل فخر لمحہ ہے۔ انہوں نے کہا کہ کانئی کے ساتھ یہ شراکت داری ہندوستانی کھلاڑیوں کو دنیا کے سب سے باوقار کھیلوں کے نظام میں تربیت اور سیکھنے کے نئے مواقع فراہم کرے گی، جس سے ہندوستان کی عالمی کھیلوں کی کارکردگی کو نئی بلندیوں تک لے جایا جائے گا۔

اطالوی نیشنل اولمپک کمیٹی کے صدر لوسیانو بوونفیلیو نے کہا کہ ہندوستان اور اٹلی دونوں کھیلوں کے لیے گہرا جنون رکھتے ہیں۔ یہ معاہدہ دونوں ممالک کے کھلاڑیوں کی دلچسپی کا پل تیار کرے گا اور لمبے وقت تک فائدہ پہنچائے گا۔

تقریب کے دوران اطالوی نائب وزیر اعظم انتونیو تاجانی نے کہا کہ یہ تعاون دونوں ممالک کے درمیان بڑھتے ہوئے تعلقات کی علامت ہے اور کھیلوں میں لوگوں اور ثقافتوں کو جوڑنے کی منفرد طاقت ہے۔ مرکزی وزیر ڈاکٹر منسکھ مانڈویہ نے کہا کہ یہ شراکت داری ہندوستان کی اولمپک تیاریوں کے لیے اہم ہے اور مستقبل کے اولمپک سائیکلوں کے لیے ہندوستانی کھلاڑیوں کی تیاری کو تقویت دے گی۔

ہندوستھان سماچار

ہندوستان سماچار / عطاءاللہ