جوکووچ نے سیمی فائنل کا جادو توڑا، ایتھنز ٹینس ٹورنامنٹ کے فائنل میں پہنچے

پیرس، 8 نومبر (ہ س)۔ سربیا کے عظیم ٹینس کھلاڑی نوواک جوکووچ نے سیمی فائنل میں اپنی شکست کے سلسلے کو توڑتے ہوئے جمعہ کو ایتھنز میں جاری اے ٹی پی ٹورنامنٹ کے فائنل میں جگہ بنا لی ہے۔ جوکووچ نے جرمنی کے کوالیفائر یانیک ہینفمین کو محض 79 منٹ میں 3-6، 4-6 سے شکست دی۔ 38 سالہ جوکووچ کی اس میچ میں سروس صرف دوسری بار ٹوٹی، لیکن اس کے باوجود انہوں نے مکمل کنٹرول کے ساتھ فتح حاصل کی۔ فائنل میں ان کا مقابلہ امریکی کھلاڑی سیبیسٹین کورڈا یا اطالوی کھلاڑی لورینزو موسیٹی میں سے کسی ایک سے ہوگا۔

خاص بات یہ ہے کہ موسیٹی کو اے ٹی پی فائنلز (ٹورین) میں جگہ بنانے کے لیے یہ خطاب جیتنا ضروری ہے۔ جوکووچ نے میچ کے بعد کہا، ’’یہ اس ٹورنامنٹ میں میرا اب تک کا بہترین ٹینس تھا اور یہ بالکل صحیح وقت پر آیا۔ ہینفمین ایک خطرناک کھلاڑی ہے — اس کی سروس اور گراونڈ اسٹروکس دونوں ہی مضبوط ہیں، اس لیے مجھے پورے میچ میں فوکس رکھنا پڑا۔‘‘

یہ جیت جوکووچ کے لیے خاص اہمیت کی حامل ہے کیونکہ انہوں نے مسلسل چار سیمی فائنل میں شکست کے سلسلے کو توڑا— وہ پہلے رولاں گیروس، ویمبلڈن، یو ایس اوپن اور شنگھائی میں سیمی فائنل میں ہار چکے تھے۔ ان کی پچھلی سیمی فائنل فتح مئی میں جنیوا کلے کورٹ ٹورنامنٹ میں ہوئی تھی، جہاں انہوں نے فائنل میں ہیوبرٹ ہورکاچ کو شکست دے کر اپنا 100 واں کیریئر سنگلز خطاب جیتا تھا۔ مردوں میں ان سے زیادہ خطاب صرف راجر فیڈرر (103) اور جمی کونرز (109) کے نام ہیں۔

میچ میں جوکووچ نے پہلے سیٹ میں 2-3 پر بریک حاصل کیا اور 3-6 سے سیٹ اپنے نام کیا۔ دوسرے سیٹ میں اگرچہ انہوں نے 1-2 پر اپنی سروس کھو دی، لیکن فوری واپسی کرتے ہوئے اسکور 3-3 کیا اور پھر فیصلہ کن بریک لے کر فتح یقینی کر لی۔ جیت کے بعد جوکووچ نے پرجوش شائقین سے خطاب کرتے ہوئے کہا، ’’ایک بار پھر اس شاندار اسٹیڈیم کو بھرنے کے لیے آپ سب کا شکریہ۔ میں نے دنیا کے کئی خوبصورت انڈور ارینا میں کھیل چکا ہوں، لیکن یہ یقیناً میرے کیریئر کے ٹاپ 3 میں سے ایک ہے۔‘‘

اس سال ایتھنز ٹورنامنٹ نے اب بند ہو چکے بیلگریڈ اوپن کی جگہ لی ہے اور مقامی شائقین کے لیے یہ جوکووچ کا مظاہرہ کسی جشن سے کم نہیں رہا۔

ہندوستھان سماچار

---------------

ہندوستان سماچار / انظر حسن