فرخ آباد، 7 نومبر (ہ س)۔ اتر پردیش میں فرخ آباد کے قادری گیٹ تھانہ علاقہ میں واقع شہر کی سب سے ہائی پروفائل آواس وکاس کالونی میں فائرنگ کے واقعہ کے بعد خوف و ہراس پھیل گیا۔شام کو سنجے سنگھ اپنی بیوی کے ساتھ سڑک پر چہل قدمی کر رہے تھے۔سنجے سنگھ کے مطابق ایک نوجوان شراب کے نشے میں گاڑی چلا رہا تھا۔ صحیح طریقے سے گاڑی چلانے کو کہا تو اس نے گالی گلوچ شروع کر دی۔ معمولی بحث کے بعد اس نے کار سے بندوق نکالی اور اندھا دھند فائرنگ شروع کر دی۔ جب جوڑے نے بھاگنے کی کوشش کی تو اس نے بندوق لے کر ان کا پیچھا کیا۔

متاثرہ سنجے کے مطابق حملہ آور نے بار بار دعویٰ کیا کہ وہ شرد سریواستو کا بیٹا ہے۔ اس کی فائرنگ سے ایک اسٹریٹ لائٹ ٹوٹ گئی۔اس واقعے کی ویڈیو سوشل میڈیا پر وائرل ہونے کے بعد پولیس کے سیکورٹی انتظامات پر سوالات اٹھنے لگے ہیں۔

واقعہ کی اطلاع پرقادری گیٹ تھانے کے انچارج کپل کمار اور آواس وکاس پولیس چوکی کے انچارج انل کمار جائے وقوعہ پر پہنچے اور واقعہ کی جانچ کی۔ تھانہ انچارج نے بتایا کہ شکایت ملنے پر رپورٹ درج کرکے کارروائی کی جائے گی۔

ہندوستھان سماچار

ہندوستان سماچار / محمد شہزاد