نئی دہلی، 6 نومبر (ہ س)۔

مرکزی وزیر تجارت اور صنعت پیوش گوئل نے جمعرات کو کہا کہ ہندوستان اور نیوزی لینڈ کے درمیان بات چیت تیزی سے آگے بڑھ رہی ہے۔ پیوش گوئل نے امید ظاہر کی کہ آزاد تجارتی معاہدہ ( ایف ٹی اے) کو جلد حتمی شکل دی جائے گی۔

تجارت اور صنعت کے مرکزی وزیر اپنے ہم منصب ٹوڈ میکلے کے ساتھ چار روزہ سرکاری دورے پر نیوزی لینڈ پہنچے ہیں تاکہ دونوں ممالک کے درمیان آزاد تجارتی معاہدے (ایف ٹی اے) مذاکرات کی پیش رفت کا جائزہ لیا جا سکے۔ گوئل نے کہا، مجھے یقین ہے کہ یہ ایک تاریخی دورہ ہے، کیونکہ ہم بہت جلد ایف ٹی اے کو حتمی شکل دینے جا رہے ہیں۔ انہوں نے اپنے ہم منصب ٹوڈ میکلے اور دونوں طرف کے چیف مذاکرات کاروں کے ساتھ جاری ہندوستان-نیوزی لینڈ آزاد تجارتی معاہدہ (ایف ٹی اے) مذاکرات کا جائزہ لیا۔

انہوں نے کہا کہ ہماری ٹیمیں مستقبل کے لیے تیار اور متوازن تجارتی معاہدے کے لیے کام کر رہی ہیں جو ہماری حساسیت کا احترام کرتے ہوئے اقتصادی تعلقات کو گہرا کرے گا، تعاون کی نئی راہیں کھولے گا اور دونوں طرف کے کاروبار اور صارفین کے لیے نئے مواقع پیدا کرے گا۔ انہوں نے مزید کہا کہ دونوں فریق ایک دوسرے کی حساسیت کا احترام کر رہے ہیں۔ ہماری ٹیموں نے شاندار کام کیا ہے۔ پیوش گوئل نے کہا کہ کچھ تفصیلات جن پر توجہ دینے کی ضرورت ہے وہ ہمارے سامنے ہیں۔ سمجھوتے کے جذبے سے بہت سی چیزوں کو حتمی شکل دی گئی ہے۔

ہندوستھان سماچار

ہندوستان سماچار / عطاءاللہ